ავტოსპორტი

12:39 | 12.01.2021 | ნანახია [] - ჯერ

დაკარზე ლიდერებმა პოზიციები შეინარჩუნეს

დაკარის მერვე ეტაპის შემდეგ, მოტოციკლების და ავტომობილების კლასებში, ლიდერებმა მოწინავე პოზიციები შეინარჩუნეს. მოტოციკლებში წინ ისევ ხოსე იგნასიო კორნეხო ფლორიმოა, რომელმაც მიმდინარე დაკარზე პირველად შეძლო ეტაპის მოგება. ავტომობილებში კი სტეფან პეტერანსელი ინარჩუნებს პირველობას.

როგორც ეტაპის გამარჯვებული, კორნეხო ფლორიმო მეცხრე ეტაპს პირველი დაიწყებს, რაც ცუდი სანავიგაციო წიგნაკის გამო, სირთულეებთან არის დაკავშირებული. ის სულ რაღაც წუთსა და 5 წამს უგებს დაკარის ორგზის ჩემპიონს, ავსტრალიელ ტობი პრაისს.

მოქმედმა ჩემპიონმა, ამერიკელმა რიკი ბრაბეკმა, როგორც წინა, მარათონული ეტაპის გამარჯვებულმა, დღევანდელი ეტაპი გახსნა და ფინიშს მესამემ მიაღწია. ამის წყალობით, საერთო ჩათვლაში ორი საფეხურით, მეექვსე ადგილამდე დაწინაურდა. სხვათა შორის, მიმდინარე რბოლაში ის პირველი მოტომრბოლია, ვინც ეტაპი პირველმა დაიწყო და წინა სამეულში დაასრულა. არადა, პროლოგის მოგების წყალობით, პირველი ეტაპიც მან გახსნა და 24-ე ადგილზე დაასრულა.

ავტომობილების კლასში, 700-კილომეტრიანი ეტაპი ყატარელი ნასერ ალ-ატიას გამარჯვებით დასრულდა. ეს მის მიერ მოგებული მეოთხე ეტაპია. ერთით ნაკლები მოგება მოქმედ ჩემპიონ კარლოს საინსს აქვს. დღესაც მან საინსს აჯობა. ფინიშზე მათ შორის სხვაობა 52 წამი იყო.

მესამე ადგილი პეტერანსელმა დაიკავა, ვინც გამარჯვებულს 3 წუთით და 3 წამით ჩამორჩა. სწორედ ამდენით შემცირდა მათ შორის სხვაობა საერთო ჩათვლაში. მარათონის დასრულებამდე 4 ეტაპით ადრე, ფრანგი ყატარელს მხოლოდ 5 წუთსა და 50 წამს უგებს.

0.158974