ავტოსპორტი

4:57 | 9.01.2021 | ნანახია [] - ჯერ

დაკარი: ტობი პრაისმა მოტოციკლებში ლიდერობა დაიბრუნა

დაკარის ორგზის ჩემპიონმა, ავსტრალიელმა ტობი პრაისმა მოტოციკლების კლასში ლიდერობა დაიბრუნა, ავტომობილებში კი წინ ისევ ფრანგი სტეფან პეტერანსელია. პრესტიჟულმა რალი მარათონმა კი გზის ნახევარი გაიარა.

მიმდინარე რბოლისას, ეს პირველი შემთხვევაა, როცა მოტომრბოლმა მეორედ შეძლო კლასიფიკაციაში დაწინაურება. პრაისმა საწყისი ეტაპი მოიგო, შემდეგ კი ყველა ეტაპს დღევანდლამდე სხვადასხვა გამარჯვებული ჰყავდა. ავსტრალიელმა მოტომრბოლმა მეორე ეტაპი 28-ე ადგილზე დაასრულა და ლიდერს 17 წუთით ჩამორჩა. მეექვსე ეტაპზე ის მხოლოდ მეშვიდე ადგილს დასჯერდა, თუმცა ლიდერობის დასაბრუნებლად, ესეც საკმარისი აღმოჩნდა.

„ძალიან არეული რბოლაა. ხან მაღლა ვიყავი, ხან დავეშვი. მაგრამ საბოლოოდ, ისევ გამარჯვებისთვის ბრძოლას დავუბრუნდი. ყველაფერი შეიძლება მოხდეს. წინ გრძელი გზა გვაქვს“, - ნარბოლევს განაცხადა პრაისმა.

მეექვსე ეტაპი ესპანელმა ხოან ბარედამ მოიგო, რომელმაც უკან მოიტოვა სამხრეთაფრიკელი როს ბრენჩი და ავსტრალიელი დანიელ სანდერსი. მოქმედი ჩემპიონი, ამერიკელი რიკი ბრაბეკი მეოთხე ადგილს დასჯერდა, რითაც მე-13 ადგილზე გადაინაცვლა. ის პრაისს 20 წუთზე ნაკლებით ჩამორჩება.

ავტომობილების კლასში ფინიშთან პირველი კარლოს საინსი მივიდა, რომელმაც მეორედ მოიგო ეტაპი. მოქმედმა ჩემპიონმა და დაკარის სამგზის გამარჯვებულმა ესპანელმა, მიმდინარე რბოლა პირველი ეტაპის მოგებით დაიწყო, მაგრამ შემდეგ პრობლემები ჰქონდა და ახლა, მოგების მიუხედავად, ლიდერ პეტერანსელს 40 წუთზე მეტით ჩამორჩება. დაკარის მრავალგზის ჩემპიონი ფრანგი, მეექვსე ეტაპზე მეოთხე შედეგს დასჯერდა.

მესამე ადგილზე გავიდა და ლიდერთან ჩამორჩენა 6 წუთამდე შეამცირა ყატარელმა ნასერ ალ-ატიამ. სამწუხაროდ, ბევრი დრო დაკარგა რალის ფრანგმა ლეგენდამ, სებასტიან ლოებმა, ვისაც დაბორცვილ გზაზე, უკანა საკიდარი გაუტყდა. ეკიპაჟს სათადარიგო ნაწილი მანქანაში არ აღმოაჩნდა, რის გამოც, გუნდის ტექნიკური პერსონალის ლოდინი მოუხდა. ფინიშის შემდეგ ლოებმა განაცხადა, რომ მისთვის რბოლა დამთავრდა.

შაბათს დაკარზე დასვენების დღეა. დარჩენილ 6 ეტაპზე, 3600 კილომეტრზე მეტია გასავლელი.

0.126959