რუსეთის პრემიერლიგის მე-18 ტურში ვოლგოგრადის „როტორმა“ უმნიშვნელოვანესი და ნანატრი გამარჯვება მოიპოვა. ალექსანდრ ხაცკევიჩის გუნდმა შინ კონკურენტ „უფას“ უმასპინძლა და კამილ მულინის 78-ე წუთზე გატანილი გოლით იმარჯვა.

ძირითად შემადგენლობაში იყვნენ ბექა მიქელთაძე, ზურიკო დავითაშვილი და ნიკა ყიფიანი, ასევე ითამაშა „დინამო ბათუმის“ მფლობელობაში მყოფმა ჯოვინო ფლამარიონმა. ყიფიანი შესვენებაზე შეცვალეს, მიქელთაძე მე-80, ხოლო დავითაშვილი 90-ე წუთზე გაიყვანეს მოედნიდან. სოლომონ კვირკველიას დისკვალიფიკაციის გამო არ უთამაშია.

„უფას“ რიგებში ჯიმი ტაბიძემ დაცვის ცენტრში შეუცვლელად ითამაშა და 66-ე წუთზე ყვითელი ბარათი მიიღო. სხვათა შორის, გაფრთიხლებები ყიფიანმა, მიქელთაძემ, დავითშვილმა და ჯოვინომაც მიიღეს. აღსანიშნავია, რომ „როტორმა“ მიმდინარე სეზონში შინ პირველად მოიგო, ხოლო მთლიანობაში მეორედ და 6-მატჩიანი მოუგებელი სერიაც შეწყვიტა (მანამდე სტუმრად „ლოკომოტივს“ აჯობა 2:1).

„როტორს“ 18 ტურის შემდეგ 11 ქულა აქვს და ისევ ბოლო ადგილზეა, თუმცა სამშვიდობო ზონამდე ჩამორჩენა შეამცირა, ხოლო პლეი-აუტამდე 2 ქულა აშორებს. მომდევნო შეხვედრაში ქართველების გუნდი 16 დეკემბერს, შინ უშუალო კონკურენტ ტულას „არსენალს“ დაუპირისპირდება. „როტორის“ არ იყოს, რთულ დღეშია ტაბიძის „უფაც“, რომელიც 13 ქულით მე-14 ადგილზე პლეი-აუტის ზონაშია, გასავარდნ ზონას ერთადერთი ქულით უსწრებს და მომდევნო ტურში 17 დეკემბერს, „კრასნოდარს“ ესტუმრება.