ATP-ს ფინალის მეხუთე დღე იმ თამაშით დაიწყო, რომელსაც უკვე არაფრის შეცვლა არ შეეძლო. ტურნირის რუს დებიუტანტ ანდრეი რუბლევს, ორი წაგების შემდეგ, მომდევნო ეტაპზე თამაშის გაგრძელების შანსი აღარ ჰქონდა. ავსტრიელმა დომინიკ თიმმა ზედიზედ ორი შეხვედრა მოიგო, მათ შორის, რაფაელ ნადალი დაამარცხა და ნახევარფინალში თამაშის უფლებაც განაღდებული ჰქონდა.

ამიტომ, მათი მიზანი განსხვავებული იყო - რუბლევს ლონდონიდან მოუგებლად წასვლა არ სურდა, თიმი კი ძალებს უნდა გაფრთხილებოდა. შედეგიც შესაბამისი მიიღეს - რუსმა 6-2 7-5 მოიგო, რისთვისაც საათი და 14 წუთი იმყოფინა. ამით მაი 200 სარეიტინგო ქულა და 153 000 დოლარიც დაიმსახურა. ცნობისათვის, ამ სეზონში რუბლევს მამაკაცთა ტურზე ყველაზე მეტი, ხუთი ტურნირი აქვს მოგებული.

რაც შეეხება თიმს, ის ნებისმიერ შემთხვევაში, ლონდონის ჯგუფში პირველ ადგილს იკავებს. კარიერაში მე-300 გამარჯვება კი მოიცდის. ნახევარფინალში მისი მეტოქე, ტოკიოს ჯგუფში მეორე ადგილზე ჩოგბურთელი იქნება.

P.S. რაფაელ ნადალის და სტეფანოს ციციპასის შეხვედრამ ლონდონის ჯგუფი დახურა. მსოფლიოს მეორე ჩოგანმა, ვისაც ATP-ს ფინალის ტიტული ჯერ არ მოუგია, ამავე ტურნირის ბერძენი ჩემპიონი სტეფანოს ციციპასი 6-4 4-6 6-2 დაამარცხა, ჯგუფში მეორე ადგილი დაიკავა და ნახევარფინალში, ტოკიოს ჯგუფის გამარჯვებულს დაელოდება, რომელიც ხვალ გამოვლინდება.