გატაცებისთვის, შეუარაცხყოფისთვის და წვითა და დაგვით ნაშოვნი ფულის წართმევისთვის ყველა ადამიანი ცოდოა სადაურიც არ უნდა იყოს და როგორიც არ უნდა იყოს. მაგრამ, განსაკუთრებულ სოლიდარობას იმსახურებს ნიგერიელი ყოფილი ფეხბურთელი კრისტიან ობოდო, რომელიც კრიმინალების მსხვერპლი უკვე მეორედ გახდა.

კრიმინალებმა კრისტიანი ფულის გამოძალვის მიზნით ჯერ 2012 წელს გაიტაცეს და ეს “ლამაზი ტრადიცია“ ამ რამდენიმე დღის წინაც გაგრძელდა. ობოდო ავტომანქანის საბარგულში ჩააგდეს, თაკარა მზის ქვეშ რამდენიმე საათი უჰაერო სივრცეში აყურყუტეს და მხოლოდ ამის შემდეგღა გაათავისუფლეს. სამწუხაროდ, ყოფილი ფეხბურთელი აღარ განმარტავს კიდევ მოუწია თუ არა გამტაცებლებისთვის ფულის გადახდა. სავარაუდოდ გადაიხადა და ამის გამხელა არ სურს.

სანამ მთელი მსოფლიო ნიგერიის პოლიციის უსუსურობაზე წუწუნებს, ბარემ ისიც გავიხსენოთ, რომ ფეხბურთს თავი კრისტიან ობოდომ 2017 წელს დაანება. განსაკუთრებულად მდიდარი არასოდეს ყოფილა მიუხედავად იმისა, რომ კარიერის მნიშვნელოვანი ნაწილი იტალიის ჩემპიონატის კლუბებში გაატარა. მართლაც რას გადაეკიდნენ...