იტალიის მოქმედმა ჩემპიონმა „იუვენტუსმა“ ალვარო მორატას ტრანსფერი ოფიციალურად დაადასტურა. ესპანელი „იუვეში“ მიმდინარე სეზონის ბოლომდე იჯარით ითამაშებს, ხოლო მადრიდის „ატლეტიკომ“ 10 მილიონი ევრო მიიღო.

ტურინელებს მორატასთან საიჯარო ხელშეკრულების 2022 წლამდე გახანგრძლივების უფლებაც ექნებათ, ოღონდ დამატებით 10 მილიონი ევროს გადახდა მოუწევთ. თუ იტალიელები ესპანელის გამოსყიდვას გადაწყვეტენ, მაშინ 2021 წელს 45 მილიონი ევრო უნდა გადაიხადონ, ხოლო თუ ამ გადაწყვეტილებას 2022 წლის ზაფხულში მიიღებენ - ფასი 35 მილიონი ევრო იქნება. შესაძლებელი იქნება ხსენებული თანხის სამ კალენდარულ წელში ეტაპობრივად გადახდაც. მორატამ 9-ნომრიანი მაისური მოირგო.

ალვაროსთვის „იუვენტუსი“ ნაცნობი ადგილია, რადგან 2014-2016 წლებში ტურინელთა ღირსებას იცავდა და 93 თამაშში 27 გოლთან ერთად 16 საგოლე პასიც მიითვალა. 27 წლის ფეხბურთელი „იუვეს“ ახალი მწვრთნელის, ანდრეა პირლოს თანაგუნდელიც იყო.

მორატამ ბოლო სეზონ-ნახევარი მადრიდის „ატლეტიკოში“ გაატარა, მანამდე კი ლონდონის „ჩელსისა“ და მადრიდის „რეალში“ ითამაშა.