ფეხბურთი

1:17 | 23.09.2020 | ნანახია [] - ჯერ

ჩემპიონთა ლიგა: ნინუას პაოკ-ი რუსეთში დამარცხდა, "ზალცბურგი" ჯგუფთან ახლოსაა

ჩემპიონთა ლიგის პლეი-ოფმა სტარტი სამი მატჩით აიღო. ნიკა ნინუას სალონიკის პაოკ-ი რუსეთში „კრასნოდარს“ ესტუმრა და ახლოს იყო დადებით შედეგთან, მაგრამ საბოლოოდ მარცხი განიცადა.

ბერძნებმა პირველი ტაიმი უკეთ ჩაატარეს და მე-7 წუთზე დიმიტრიოს პელკასმა პენალტი ვერ გაიტანა, თუმცა 33-ე წუთზე შეცდომა გამოასწორა და ანგარიში სწორედ მან გახსნა. რუსებმა გათანაბრება პირველივე ტაიმში შეძლეს, თავი ვიქტორ კლაესონმა გამოიჩინა, შვედმა თერთმეტმეტრიანის გატანა მოახერხა. 70-ე წუთზე „კრასნოდარს“ გამარჯვება რემი კაბელამ მოუტანა - 2:1. წყვილში ჯერ არაფერი გარკვეულა, რადგან 30 სექტემბერს, გუნდები სალონიკში დაუპირისპირდებიან. რაც შეეხება ნინუას, ქართველი ნახევარმცველი განაცხადში იყო, მაგრამ 90 წუთის განმავლობაში სათადარიგო სკამზე დარჩა.

ჩემპიონთა ლიგის ჯგუფურ ეტაპს ძალიან მიუახლოვდა ავსტრიული „ზალცბურგი“, რომელმაც თელ ავივში „მაკაბი“ 2:1 დაამარცხა. ისრაელის ჩემპიონმა ტაიმი დან ბიტონის გოლით მოიგო, მაგრამ შესვენების შემდეგ ავსტრიელებმა მალავე დომინიკ შობოშლაისა და მასაი ოკუგავას გოლებით თამაში შეატრიალეს. კიდევ ერთი დაპირისპირება პრაღაში შედგა, სადაც „სლავია“ და დანიური „მიტდიულანდი“ უგოლოდ დაზავდნენ. საპასუხო მატჩები სამი შემთხვევაში 30 სექტემბერს ჩატარდება.

ოთხშაბათს კი პლეი-ოფის დარჩენილი სამი მატჩია დაგეგმილი: „გენტი“ - კიევის „დინამო“, „მიოლდე“ – „ფერენცვაროში“ და „ოლიმპიაკოსი“ – „ომონია“. გიორგი ჩაკვეტაძემ გუნდთან ერთად ვარჯიში დაიწყო, თუმცა მოახლოებულ მატჩში ვერ ითამაშებს, რადგან განაცხადში ვერ მოხვდა. ცხადია მიზეზი, დაზიანებაა, რომელიც ჰქონდა და ჯერ სათამაშოდ მზად არ არის.

„კრასნოდარი“ - პაოკ 2:1 (1:1)

გოლები: 0:1 პელკასი (33), 1:1 კლაესონი (39, პენ), 2:1 კაბელა (70)

„მაკაბი“ – „ზალცბურგი“ 1:2 (1:0)

გოლები: 1:0 ბიტონი (9), 1:1 შობოშლაი (49, პენ), 1:2 ოკუგავა (57)

„სლავია“ – „მიდტიულანდი“ 0:0 (0:0)

0.162132