„ბარსელონას“ თავდამსხმელი ლუის სუარესი „იუვენტუსში“ არ გადავა. RAC 1-ის ინფორმაციით, 6 ოქტომბრამდე, ურუგვაელი იტალიის პასპორტის აღებას ვერ მოახერხებს, სხვაგვარად კი იტალიაში მისი გადასვლა გამორიცხულია.

სუარესს არაევროკავშირელის პასპორტი აქვს და „იუვეს“ მისი დამატება ამიტომ არ შეუძლია. იტალიის მოქალაქეობის მიღების პროცესი ძალიან გაიწელა და „ელ პისტოლეროს“ ტრანსფერი პრაქტიკულად ჩაიშალა.

თუმცა, ეს არ ნიშნავს იმას, რომ „ბარსელონას“ არ დატოვებს. უფრო მეტიც, რონალდ კუმანი მას თავის გეგმებში არ განიხილავს და გუნდი უნდა დატოვოს. ცხადია, 33 წლის ფორვარდს შეთავაზებები არ აკლია. „იუვემ“ კი არჩევანი „რომას“ ფორვარდ ედინ ჯეკოზე გააკეთა.

შეგახსენებთ, რომ ლუის სუარესი „ბარსელონაში“ 2014 წლიდან თამაშობს და 283 მატჩში 198 გოლი გაიტანა.