სერენ უილიამსი იტალიის ღია პირველობას გამოტოვებს, რომელმაც სტარტი ორშაბათს აიღო. ამის მიზეზი, აქილევსის მყესის ტრავმაა, რომელიც ფლეშინგ მოდოუსზე, ბელარუს ვიკტორია აზარენკასთან შეხვედრისას მიიღო.
იმ შეხვედრის დროს, სერენას სამედიცინო პაუზა აიღო, რა დროსაც ტერფი დაუმუშავეს და ხელახლა შეუხვიეს. მაშინ მან თამაშის გაგრძელება შეძლო. ტურნირის შემდეგ სერენამ გადაწყვიტა, რომ სჯობს ფეხი დაასვენოს.
„სამწუხაროდ, აქილევსის დაჭიმულობის გამო, იტალიის ტურნირზე გამოსვლას ვერ ვახერხებ. ჩემი იტალიელი ფანების მხარდაჭერით აღტაცებული ვარ. რომში თამაში ძალიან მიყვარს და იმედია, აქ მალე დავბრუნდები“, - განაცხადა მსოფლიოს ყოფილმა პირველმა ჩოგანმა.
უილიამსის გარდა, რომაული ტურნირის ქალთა ბადეს ასევე დააკლდებიან უიმბლდონის ორგზის ჩემპიონი, ჩეხი პეტრა კვიტოვა, აშშ-ის ღიას შარშანდელი ჩემპიონი, კანადელი ბიანკა ანდრეესკუ, ასევე მსოფლიოს პირველი ჩოგანი, ავსტრალიელი ეშ ბარტი. მამაკაცთა ბადეში კი აშშ-ის ღიას ფინალისტები, ავსტრიელი დომინიკ ტიმი და გერმანელი ალექსანდერ ზვერევი არ ითამაშებენ.
