მსოფლიოს ოთხგზის ჩემპიონ სებასტიან ფეტელი მომავალი სეზონიდან „ასტონ მარტინში“ გადავა, რომელიც მიმდინარე სეზონში „რეისინგ პოინტის“ სახელით ასპარეზობს და რომელსაც „ვარდისფერ მერსედესს“ უწოდებენ. გერმანელმა პილოტმა ახალ გუნდთან მრავალწლიანი კონტრაქტი გააფორმა.

33 წლის ფეტელი „ასტონ მარტინში“ მექსიკელ სერხიო პერესს შეცვლის, რომლის გაშვების შესახებაც, გუნდმა უფრო ადრე გამოაცხადა, ვიდრე ფეტელთან კონტრაქტს გვამცნობდა. ამგვარად, ფეტელის თანაგუნდელი, კანადელი ლანს სტროლი იქნება, რომელიც „ასტონ მარტინის“ მფლობელის, ლორენს სტროლის შვილია.

„მოხარული ვარ გაცნობოთ ეს ახალი ამბავი, ჩემი მომავლის შესახებ. სიამაყით ვაცხადბ, რომ 2021 წლიდან ასტონ მარტინის წევრი ვიქნები. ჩემთვის ეს ახალი თავგადასავალი იქნება ლეგენდარულ საავტომობილო კომპანიაში. გუნდს ამ სეზონში საოცარი შედეგები აქვს და მჯერა, რომ მომავალი კიდევ უფრო წარმატებული ექნება. ჩემს ერთადერთ მოტივაციად, კვლავ მოწინავეთა შორის რბოლა რჩება“, - განაცხადა ფეტელმა.

გუნდის და ფეტელის განცხადებაში, მათი კონტრაქტის დეტალებზე ლაპარაკი არაა. თუმცა „ასტონ მარტინი“ მინიშნებით აცხადებს, რომ ფეტელთან კონტრაქტი „2021 წელზე და უფრო შორსაც“ ვრცელდება.

როგორც ცნობილია, „ფერარიმ“ ჯერ კიდევ სეზონის დაწყებამდე გამოაცხადა, რომ ფეტელთან კონტრაქტს აღარ აგრძელებს და გერმანელის ადგილზე, კონტრაქტი ესპანელ კარლოს საინსს გაუფორმა.

მიმდინარე ჩემპიონატის რვა რბოლის შემდეგ, „რეისინგ პოინტს“ კონსტრუქტორთა ჩემპიონატზე მეოთხე ადგილი უკავია, „ფერარი“ კი მეექვსეა.