საქართველოს ოცდათერთმეტმა სარაგბო კლუბმა რაგბის კავშირს ერთობლივი განცხადებით მიმართა. ორმა კლუბმა: „ლელომ“ და ქუთაისის „აიამ“ კი აღნიშნულისგან თავი შეიკავეს. მიუხედავას ამისა, იმერულმა კლუბმა საკითხისადმი მხარდაჭერა სიტყვიერად გამოხატა.
განცხადების თანახმად კლუბები ითხოვენ, სასწრაფოდ განახლდეს როგორც უმაღლესი, ასევე დაბალი ლიგის გათამაშებები, წინააღმდეგ შემთხვევაში, კიდევ უფრო შემცირდება სპორტის ამ სახეობაში ბავშვების მონაწილეობა და მოთამაშეების სხვა ქვეყნების დაბალი დონის ლიგებში გადასვლის ან სულაც რაგბიდან წასვლის ფაქტები გაიზრდება.
კლუბების წარმომადგენლები ასევე აპროტესტებენ ფაქტს იმის შესახებ, რომ ჯერ არ შექმნილა რაგბის კავშირის კრიზისული მართვის სათათბირო საბჭო, სადაც მათ მიერ წარდგენილი კანდიდატების შეყვანას ხელს უშლიან.
განცხადებას უცვლელად გთავაზობთ:
"როგორც თქვენთვის ცნობილია რაგბის კლუბების უმრავლესობა შესულია ღრმა ფინანსურ კრიზისში, რისი მთავარი მიზეზია კლუბებზე გამოყოფილი მწირი რესურსი, რომელიც 2011 წლის შემდეგ არ გაზრდილა, ხოლო პანდემიამ და რაგბის კავშირის უმოქმედობამ აღნიშნული კრიზისი კიდევ უფრო გააღრმავა. დღეს შექმნილია სიტუაცია, როცა სახელმწიფოს მონაწილეობის გარეშე შეუძლებელია ამ კრიზისის დაძლევა.
რაგბის კავშირის უმოქმედობის ფონზე იძულებული გავხდით ივნისის თვიდან სარაგბო კლუბები შევკრებილიყავით ქართული რაგბის გადასარჩენად და ერთად შეგვემუშავებინა იმ ღონისძიებების ნუსხა, რომელთა განხორციელება ჩვენი აზრით დაგვეხმარება გადაუდებელი პრობლემების დაძლევაში.
აღნიშნული ღონისძიებები, წარვადგინეთ რაგბის კავშირის ყოფილ პრეზიდენტთან და მთავრობის წარმომადგენლებთან. საქართველოს განათლების, მეცნიერების, კულტურისა და სპორტის სამინისტრომ გამოთქვა მზაობა ამ რთული სიტუაციის მოსაგვარებლად, ფინანსური დახმარება გაეწია სარაგბო კლუბებისთვის. ასევე მიღებულ იქნა რეკომენდაცია შექმნილიყო კრიზისის მართვის ჯგუფი, რომელსაც კოლექტიურად უნდა ემართა რაგბის კავშირი, მოეგვარებია ჩემპიონატის განახლების საკითხი და მიეყვანა კავშირი პრეზიდენტის არჩევნებამდე, რომელიც გამგეობის გადაწყვეტილებით ჩატარდება ამა წლის დეკემბრის ბოლოს. ნიშანდობლივია, რომ გადაწყვეტილება ანტიკრიზისული საბჭოს შექმნის შესახებ ასევე გაჟღერებულია ყოფილი პრეზიდენტის გადადგომის განცხადებაში.
სამწუხაროდ დღევანდელი რაგბის კავშირის პრეზიდენტის მოვალეობის შემსრულებლის გიორგი გორგასლიძის მიერ: დღემდე არ შექმნილა ზემოაღნიშნული საბჭო;
- არის მცდელობა რომ საბჭოს ფუნქცია მართვის ნაცვლად ჩანაცვლდეს მრჩევლის ფუნქციით;
- მიმდინარეობს ხელის შეშლა კლუბების აბსოლუტური უმრავლესობის მიერ წარდგენილი კანდიდატების საბჭოში შეყვანაზე;
- გვინდა აღვნიშნოთ, რომ ყოველი დაკარგული დღე იწვევს აუნაზღაურებელ ზარალს ქართული რაგბისთვის და საბჭოს შექმნა არის სასიცოცხლოდ მნიშვნელოვანი, რათა სწრაფად მოხდეს სახელმწიფოს მიერ კლუბებისთვის რესურსის გამოყოფა და რაც შეიძლება სწრაფად განახლდეს ჩემპიონატი. წინააღმდეგ შემთხვევაში ჩვენ კიდევ უფრო შეგვიმცირდება რაგბში ჩართული ბავშვების ოდენობა. გაიზრდება ლიგის მოთამაშეების სხვა ქვეყნის დაბალი დონის ლიგებში გადასვლის ან სულაც რაგბიდან წასვლის შემთხვევები.
- აქვე დავსძენთ, რომ თუ ყველა კლუბში უახლოეს დღეებში არ აღდგება ვარჯიშები ისე, რომ მაქსიმუმ 26 სექტემბრამდე განახლდეს საქართველოს ჩემპიონატი, დაირღვევა მსოფლიო რაგბის რეკომენდაცია და სავარაუდოდ საქართველოს ნაკრები მოკლებულ იქნება შესაძლებლობას ეთამაშოს შოტლანდიის ნაკრებს და მას დამატებითი პრობლემები შეექმნება რუსეთთან გასამართ მატჩთან დაკავშირებით.
- გვინდა აღვნიშნოთ, რომ უკვე ძალიან მივუახლოვდით იმ ზღვარს, რომლის გადაკვეთის შემდეგაც რაგბის გადარჩენა და არსებულ სიმაღლეებზე დაბრუნებას დასჭირდება ათჯერ მეტი რესურსი და ენერგია ვიდრე დღეს არის საჭირო.
- ამ ყველაფერმა შესაძლოა საბოლოოდ გამოიწვიოს ეროვნული და ასაკობრივი ნაკრებების დასუსტება და უამრავი თაობის წვალებით მოტანილი სარაგბო რეპუტაციის გაქრობა საზოგადოებაში.
- ასევე შესაძლოა გამოიწვიოს მსოფლიო სარაგბო რუკაზე საქართველოს სახელის გაქრობას, რაც წარმოუდგენელი დარტყმა იქნება ქვეყნის საერთაშორისო რეპუტაციისთვის.
- ყოველივე ზემოღნიშნულიდან გამომდინარე მოგმართავთ თხოვნით დაგვეხმაროთ აღნიშნული პრობლემების მოგვარებაში რათა ერთად გადავარჩინოთ ქართული რაგბი.
აქვე გეტყვით, რომ 14 აგვისტოს აღნიშნულ საკითხთან დაკავშირებით რაგბის კავშირში იგეგმება პრესკონფერენცია, სადაც დაწვრილებით გაგაცნობთ საქმის მიმდინარეობას."
