ავტოსპორტი

1:50 | 6.08.2020 | ნანახია [] - ჯერ

ინდი 500 მაყურებლის გარეშე გაიმართება

ინდიანაპოლისის 500-მილიანი რბოლის ორგანიზატორებმა გამოაცხადეს, რომ წელს რბოლა მაყურებლის გარეშე ჩატარდება. პირვანდელი გეგმით, ტრიბუნაზე 100 ათასი მაყურებლის დაშვება იყო გადაწყვეტილი. თუმცა შეერთებულ შტატებში კორონავირუსის პანდემიის გართულების გამო, საბოლოოდ მაყურებლის დაშვებისგან თავი შეიკავეს.

ტრადიციულად, ინდი 500 მაისის ბოლო უქმეებზე უნდა გამართულიყო, მაგრამ პანდემიის გამო, ის 23 აგვისტოსთვის გადმოიტანეს. მაყურებლის არდაშვება იმის გამო გადაწყდა, რომ ინდიანას შტატში, სადაც რბოლა ტარდება, ვირუსით ინფიცირების რაოდენობა გაორმაგდა.

„ჩვენ გვსურდა, რომ ტრიბუნებზე, მათი ტევადობის მეოთხედი მაყურებელი დაგვეშვა. მაგრამ ქალაქის და შტატის ხელისუფლების მიერ გატარებული ზომების მიუხედავად, ინდიანაში სიტუაცია გაუარესდა. ჩვენ თავიდანვე ვთქვით, რომ საზოგადოების ჯანმრთელობა და უსაფრთხოება უმთავრესია. მაყურებლის შეზღუდულად დაშვება, ივნისში ნორმალურად ჩანდა. მაგრამ ახლანდლ სიტუაციაში მიუღებელია“, - ნათქვამია „ინდიანაპოლის მოტორ სპიდუეის“ განცხადებაში.

ითვლება, რომ ინდი 500-ს მსოფლიოში, სპორტის ყველა სახეობას შორის, ყველაზე მეტი მაყურებელი ესწრება. ტრასას 250 000 მუდმივი დასაჯდომი ადგილი აქვს. გარდა ამისა, 4-კილომეტრიანი ტრასის გარშემო არსებული ადგილებიდან, რბოლას ათობით ათასი მაყურებელიც ადევნებს თვალს.

კორონავირუსის ჩაკეტილობის შემდეგ, ინდიქარის სერიის ჩემპიონატი 6 ივნისს განახლდა და მას შემდეგ სულ 6 რბოლაა ჩატარებული. ამ რბოლებიდან ზოგს მაყურებელი შეზღუდული რაოდენობით დაესწრო.

0.160943