საქართველოს ჩემპიონატში უახლოეს პერიოდში სტადიონზე გულშემატკივრები დაბრუნდებიან. ამის შესახებ საქართველოს ფეხბურთის ფედერაციის პრეზიდენტმა ლევან კობიაშვილმა განაცხადა.
მთავრობის უწყებათშორის საკოორდინაციო საბჭოს გადაწყვეტილებით უახლოეს დღეებში პროტოკოლში ცვლილებები შევა მაყურებლების სტადიონებზე დაშვების თაობაზე.
“თვეზე მეტია, რაც ჩემპიონატი დაიწყო, თუმცა მაყურებლების გარეშე. ალბათ ნანახი გაქვთ კადრები, როცა სტადიონებს მიღმა ადამიანები იკრიბებიან ვიწრო სივრცეში და ეს ნამდვილად არ არის სასურველი. შესაბამისად, დადგა გულშემატკივრების სტადიონზე დაშვების საკითხი. სასიხარულოა, რომ მომდევნო დღეების განმავლობაში პროტოკოლში იქნება შეტანილი გულშემატკივრის საფეხბურთო მატჩებზე დასწრების საკითხი. აღნიშნული დაშვება მოხდება შეზღუდვებით, უსაფრთხოების ყველა ნორმის დაცვით, სტადიონის ტევადობის შესაბამისად. თითოეული გულშემატკივრის პასუხისმგებლობაა, დაიცვას ის მოცემულობა, რაც პროტოკოლით იქნება გათვალისწინებული“, - თქვა კობიაშვილმა.
შეგახსენებთ, მარტში შეწყვეტილი ეროვნული ლიგა ივნისში უმაყურებლოდ განახლდა. ჯერჯეობით ზუსტი თარიღი უცნობია, როდიდან და რა რეგულაციებით დაიშვებიან ქომაგების სტადიონებზე.
