მსოფლიოს ექვსგზის ჩემპიონმა ლუის ჰამილტონმა უნგრეთის დიდი პრიზის საკვალიფიკაციო რბოლა რეკორდული დროით მოიგო. ეს მის მიერ კარიერაში მოპოვებული 90-ე პოულ პოზიციაა. „მერსედესის“ პილოტმა დაახლოებით წამით გააუმჯობესა ტრასის საკვალიფიკაციო რეკორდი, რომელიც შარშან მაქს ფერსტაპენმა დააფიქსირა.
ჰამილტონს დიდი შანსი აქვს, უნგრული დიდი პრიზი მერვედ მოიგოს და ამით, მიხაელ შუმახერის უნგრულ მონაგარს გადაასწრებს. საინტერესოა ისიც, რომ ერთი და იგივე დიდი პრიზი რვაჯერ ჯერჯერობით მხოლოდ შუმახერს აქვს მოგებული, რომელმაც ეს საფრანგეთში შეძლო.
ჰამილტონმა კვალიფიკაციის მესამე ნაწილში, პირველივე ცდაზე შეძლო რეკორდული დროის დაფიქსირება, მეორე ცდაზე კი მას დაახლოებით 0.2 წამი მოაკლო. რომ არა დროის გაუმჯობესება, პოული ვალტერი ბოტასს დარჩებოდა, რომელიც საბოლოოდ, ტიტულოვან თანაგუნდელს მხოლოდ 0.1 წამით ჩამორჩა.
მეორე რიგში ორივე ადგილი „რეისინგ პოინტის“ პილოტებმა დაისაკუთრეს. მათგან უკეთესი ლანს სტროლი იყო. სერხიო პერესს პირველი ცდა არ ჩაეთვალა, რადგან მეოთხე მოსახვევში, ტრასის ლიმიტი დაარღვია. მექსიკელმა ნარბოლევს განაცხადა, რომ საკვალიფიკაციო რბოლისას, თავბრუსხვევა აწუხებდა.
მესამე რიგი „ფერარის“ პილოტებისაა. და მხოლოდ მე-7 ადგილს დასჯერდა ფერსტაპენი. არადა მოსალოდნელი იყო, რომ უნგრეთში ის და „რედ ბული“ სამქიმიანებს კონკურენციას გაუწევდნენ.
წინსვლა აქვს „უილიამსს“ - მისმა ორივე პილოტმა კვალიფიკაციის მეორე ნაწილში ასპარეზობის უფლება მოიპოვა. ამასთან, იყო მომენტი, როცა ჯორჯ რასელს მესამე საუკეთესო დრო ჰქონდა. საბოლოოდ ის მე-12 დროს დასჯერდა.
უნგრეთის დიდი პრიზი
კვალიფიკაცია
- ლუის ჰამილტონი (ბრიტანეთი, მერსედესი) 1:13.447
- ვალტერი ბოტასი (ფინეთი, მერსედესი) +0.107
- ლანს სტროლი (კანადა, რეისინგ პოინტი) 0.930
- სერხიო პერესი (მექსიკა, რეისინგ პოინტი) 1.098
- სებასტიან ფეტელი (გერმანია, ფერარი) 1.327
- შარლ ლეკლერი (მონაკო, ფერარი) 1.370
- მაქს ფერსტაპენი (ჰოლანდია, რედ ბული) 1.402
- ლანდო ნორისი (ბრიტანეთი, მაკლარენი) 1.519
- კარლოს საინსი (ესპანეთი, მაკლარენი) 1.580
- პიერ გასლი (საფრანგეთი, ალფატაური) დროის გარეშე
- დანიელ რიკარდო (ავსტრალია, რენო) 2.214
- ჯორჯ რასელი (ბრიტანეთი, უილიამსი) 2.251
- ალექს ალბონი (ტაილანდი, რედ ბული) 2.268
- ესტებან ოკონი (საფრანგეთი, რენო) 2.295
- ნიკოლას ლატიფი (კანადა, უილიამსი) 3.097
- კევინ მაგნუსენი (დანია, ჰაასი) 2.705
- დანიილ კვიატი (რუსეთი, ალფატაური) 2.757
- რომენ გროჟანი (საფრანგეთი, ჰაასი) 2.960
- ანტონიო ჯოვინაცი (იტალია, ალფა რომეო) 3.059
- კიმი რაიკონენი (ფინეთი, ალფა რომეო) 3.167
