ესპანეთის ლიგა ენდესას ფინალურ ტურნირში თორნიკე შენგელიას „ბასკონიამ“ პირველი მარცხი განიცადა. კატალონიის „ბარსელონასთან“ ვიტორიელებმა ბოლომდე იბრძოლეს, მაგრამ გამარჯვება ვერ შეძლეს.

თამაში „ბარსელონას“ უპირატესობით დაიწყო და პირველი პერიოდი 20:11 მოიგეს, თუმცა, შემდეგ „ბასკონია“ უკეთ გამოიყურებოდა, ამიტომაც დასკვნითი მეოთხედის წინ მისი უპირატესობა ერთქულიანი გახლდათ. ამის მიუხედავად, გადამწყვეტ მომენტში „ბარსა“ უფრო მძლავრი აღმოჩნდა და საბოლოოდ 81:75.

თორნიკე შენგელიამ პარკეტზე 31:43 წუთი გაატარა და შეტევაში საკმაოდ უფერულად გამოიყურებოდა: 10-დან 5 ორქულიანი (50%), 4-დან 2 საჯარიმო (50%) და 4 არაზუსტი სამქულიანი. შედეგად, 12 ქულა, 6 მოხსნა, 1 პასი და მარგი ქმედების მხოლოდ 5 კოეფიციენტი.

თავი ვერც მეტ ჯენინგმა გამოიჩინა, რომელმაც 12 წუთში 2 ქულა და 2 პასი მიითვალა, რაც ცხადია დიდი ვერაფერი მონაგარია.

„ბასკონიას“ სამი ტურის თავზე 2 მოგების წილ 1 წაგება აქვს, ზუსტად იგივე მაჩვენებელი, რაც „უნიკახას“. მომდევნო ტურში 23 ივნისს, შენგელია და მისი თანაგუნდელები სწორედ მალაგელებს გაეჯიბრებიან და ნახევარფინალის საგზურის მფლობელსაც ერთმანეთში გაარკვევენ.