კატალონიის „ბარსელონა“ სამთვიანი პაუზის შემდეგ შესანიშნავად დაუბრუნდა ლა ლიგას და „რეალთან“ უპირატესობა გაიმყარა.

„ბარსასთვის“ „მალიორკასთან“ თამაში თავიდანვე ყველაფერი იდეალურად დაიწყო დაპირველივე ხეირიანი შეტევა გოლით დასრულდა. ჟორდი ალბას ფლანგურ გადაცემას არტურო ვიდალი გამოეხმაურა და ანგარიშიც გაიხსნა.

პირველი ტაიმის მიწურულს კატალონელთა უპირატესობა გაორმაგდა. ლიონელ მესიმ მარტინ ბრაითვაითს გაატანინა, ეს დანიელის სადებიუტო გოლი იყო „ბარსელონას“ მაისურით.

ისიც ვთქვათ, რომ მესი ჩინებულ ფორმაში შეხვდა რესტარტს, თან იმის ფონზე, რომ ცოტა ხნის წინ ტრავმაც აწუხებდა. ლეომ ჯერ ალბას გაატანინა და მეორე საგოლე პასი მიითვალა, ხოლო ბოლოსკენ თავად გაიტანა, მიმდინარე სეზონში უშუალოდ ლა ლიგაში მეოცე გოლი. ისიც გამოვარჩიოთ, რომ დაბრუნდა ლუის სუარესი, რომელიც მინდორზე მეორე ტაიმში გამოჩნდა.

„ბარსელონამ“ 61 ქულას მოუყარა თავი და სატურნირო ცხრილში პირველ ადგილზეა. ვნახოთ, როგორ უპასუხებს კონკურენტს მადრიდის „რეალი“, რომელიც დღეს „ეიბარს“ დაუხვდება.

„მალიორკა“ – „ბარსელონა“ 0:4 (0:2)

გოლები: 0:1 ვიდალი (2), 0:2 ბრაითვაითი (37), 0:3 ჟორდი ალბა (79), 0:4 მესი (90)