ფორმულა 1-მა მსოფლიოს 2020 წლის ჩემპიონატის კალენდრის განახლებული ვერსიის პირველი ნაწილი გამოაქვეყნა, რომელშიც 8 ეტაპი შევიდა. ახალი სეზონი 5 ივლისს, ავსტრიის დიდი პრიზით დაიწყება. ერთი კვირის შემდეგ კი იმავე „რედ ბულ“ რინგზე, მეორე რბოლაც გაიმართება.

მომდევნო გაჩერება უნგრეთია - ბუდაპეშტის ჰუნგარორინგი ერთკვირიანი დაშორებით, მესამე ეტაპს მიიღებს, რასაც ორკვირიანი პაუზა და სილვერსტოუნზე ერთკვირიან შუალედში, ზედიზედ ორი რბოლა მოჰყვება. შემდეგ კი ბარსელონას, სპას და მონცას ჯერი დადგება.

რვავე რბოლის მხარდამჭერ რბოლებს ფორმულა 2 და ფორმულა 3 ჩაატარებენ. ამასთან, პირველი რბოლები მაყურებლის გარეშე ჩატარდება. ფორმულა 1 კალენდარს მალე სხვა რბოლებითაც შეავსებს, რომლებთან დაკავშირებითაც, მუშაობა გრძელდება. სავარაუდოდ, კალენდრის საბოლოო ვარიანტში, 15-18 ეტაპი შევა.

ფორმულა 1-ის 2020 წლის მსოფლიო ჩემპიონატის კალენდრის პირველი ნაწილი:

5 ივლისი რედ ბულ რინგი

12 ივლისი რედ ბულ რინგი

19 ივლისი ჰუნგარორინგი

2 აგვისტო სილვერსტოუნი

9 აგვისტო სილვერსტოუნი

16 აგვისტო მონტმელო

30 აგვისტო სპა ფრანკორშანი

6 სექტემბერი მონცა