დორტმუნდის „ბორუსიას“ ზაფხულში მარიო გიოტცე დატოვებს. ინფორმაცია გერმანული გუნდის სპორტულმა დირექტორმა მარკ ცორკმა დაადასტურა.

„ჩვენი ურთიერთობა მარიოსთან ამ ზაფხულს დასრულდება. გადაწყვეტილება ურთიერთთანამშრომლობით მივიღეთ, მშვიდობიანი დიალოგის შემდეგ. მარიო განსაკუთრებული ბიჭია“, - თქვა ცორკმა Sky Germany-სთან საუბარში.

ამრიგად, მარიო გიოტცე „დორტმუნდს“ მეორედ ტოვებს და თავისუფალი აგენტი გახდება. 28 წლის ფეხბურთელმა სახელი სწორედ „ყვითლებში“ გაითქვა, საიდანაც 2013 წელს „ბაიერნში“ გავიდა, მაგრამ სამი სეზონის შემდეგ „სიგნალ იდუნა პარკზე“ დაბრუნდა.

სად გაგრძელდება 2014 წლის მსოფლიო ჩემპიონატის ფინალის გმირის კარიერა ჯერჯერობით უცნობია.