მადრიდის „რეალის“ სამწვრთნელო შტაბის ყოფილი წევრი ანხელ კაპა მიიჩნევს, რომ კრიშტიანუ რონალდზე უფრო ჭკვიანი ფეხბურთელი უგო სანჩესი იყო. არგენტინელის განცხადებით, მექსიკელი საჯარიმოში უფრო ცოცხალი თავდამსხმელი გახლდათ, ვიდრე რონალდუა.
„უგო ბევრად უფრო ჭკვიანი ფეხბურთელი იყო, ვიდრე კრიშტიანუ. რონალდუ ძლიერია ორივე ფეხით, თავით თამაშში, მაგრამ სანჩესი მეტოქის საჯარიმოში გაცილებით ცოცხალი იყო. მან იცოდა როგორ მოეტყუებინა მცველები, რომლებიც მუდმივად მოძრაობდნენ მასთან ბურთი ჰქონდა თუ არა. სანჩესი ამ თვალსაზრისით მართლაც გამორჩეული გახლდათ“, - თქვა არგენტინელმა.
შეგახსენებთ, კაპა მადრიდის „რეალში“ 1994-1996 წლებში ხორხე ვალდანოს ასისტენტი იყო. უგო სანჩესი კი ესპანური გრანდის ღირსებას 1985-1992 წლებში იცავდა და მადრიდელთა რიგებში ჩატარებულ 283 შეხვედრაში 208 გოლი გაიტანა.
