ფეხბურთი

17:56 | 26.04.2020 | ნანახია [] - ჯერ

კობიაშვილი: "კონტრაქტით, ოფიციალურად ვაისი საქართველოს ნაკრების მწვრთნელი აღარაა"

საქართველოს ფეხბურთის ფედერაციის პრეზიდენტმა ლევან კობიაშვილმა ტელეკომპანია „იმედის“ გადაცემა „სპორტი იმედზე“ სტუმრობისას განაცხადა, რომ ვლადიმირ ვაისი ოფიციალურად საქართველოს ნაკრების მთავარი მწვრთნელი აღარ არის.

სლოვაკს მარტში კონტრაქტი ამოეწურა და ამიტომაც აღარ მიიჩნევა მწვრთნელად, მაგრამ ორივე მხარის სურვილია, რომ თანამშრომლობა განაახლონ.

„ბელარუსთან მატჩის გაუქმება გაორიცხულია, რადგან ევროპის ჩემპიონატის ოთხი ნაკრები გამოსავლენია. 11 მაისს იმსჯელებენ მატჩის ჩატარების თარიღზე და მაისის ბოლოს საბოლოოდ გახდება ცნობილი. დღეისთვის არსებობს მოსაზრება, რომ სექტემბრიდან ახალი ერთა ლიგის გათამაშებას მიებას ეს საპლეი-ოფო მატჩები. მარტივად რომ ვთქვათ, 6 სათამაშო დღის ნაცვლად გახდეს 8 სათამაშო დღე. მაგალითად, სექტემბერსა და ოქტომბერში იყოს სამ-სამი თამაში და ნოემბერში პლეი-ოფის ორი მატჩი. უმაყურებლოდ ჩატარებას რაც შეეხება, ჯერ ამის განხილვა არ ყოფილა.

შემიძლია დავადასტურო, რომ ვლადიმირ ვაისს ჩვენთან კონტრაქტი მარტის ბოლოს ამოეწურა. შესაბამისად, ოფიციალურად, ხელშეკრულებით საქართველოს ნაკრებს მწვრთნელი აღარ ჰყავს. თუმცა მას შემდეგ, რაც გაირკვა, რომ მარტში თამაშები არ იქნებოდა, ვესაუბრეთ ვაისს და ორივე მხარის სურვილია, რომ ვითანამშრომლოთ, თუმცა ოფიციალურად არ გვაქვს 100%-იანი გარანტია, რომ ვთქვათ ჩვენი მწვრთნელია. მაგრამ ამას პოზიტიურად ვუყურებ და ვიმედოვნებთ, რომ ახლო მომავალში შეგვეძლება ოფიციალურად დავადასტუროთ. ვნახოთ, რთული ვითარებაა, მხოლოდ ის ვიცით, რომ სექტემბრამდე თამაშები არ გვექნება და მერეც რა იქნება, შესაბამისად, არაა ადვილი ასეთ დროს კონტრაქტის გაფორმება. იმედია ახლო მომავალში გავაგრძელებთ თანანმშრომლობას, მაგრამ დეტალებზე ახლა ვერ ვისაუბრებ“, - თქვა კობიაშვილმა.

შეგახსენებთ, ვლადიმირ ვაისი საქართველოს ნაკრებს 2016 წლის გაზაფხულიდან წვრთნიდა.

0.132698