ავტოსპორტი

1:28 | 14.04.2020 | ნანახია [] - ჯერ

ავტოსპორტის ლეგენდა სერ სტირლინგ მოსი 90 წლისა გარდაიცვალა

ფორმულა 1-ის და მთლიანად ავტოსპორტის ისტორიაში ერთ-ერთი ყველაზე გამორჩეული მრბოლი, სერ სტირლინგ მოსი, ხანგრძლივი ავადმყოფობის შემდეგ, 90 წლის ასაკში გარდაიცვალა.

მოსი 1951-1961 წლებში, დიდი პრიზების არენაზე ერთ-ერთი ყველაზე გამორჩეული მრბოლი იყო. ის არასდროს ყოფილა მსოფლიო ჩემპიონი, მარტო სამჯერ, ტიტულისთვის ბრძოლაში, ლეგენდარულ ხუან მანუელ ფანჯოსთან წააგო. აქტიური მრბოლის კარიერა კი იძულებით, 1962 წელს დაასრულა მას შემდეგ, რაც გუდვუდში მომხდარი ავარიისას, თავის მძიმე ტრავმა მიიღო.

მოსის კარიერა მხოლოდ 10 წელი გაგრძელდა და ამ დროში, მან ფ1-ის 16 რბოლის მოგება (66-დან) შეძლო. მათგან პირველი 1955 წელს, ბრიტანეთის დიდ პრიზზე მოიპოვა, თუმცა თავად თვლიდა, რომ ეს გამარჯვება ფანჯოს დამსახურებაა, რომელმაც მოსისვე თქმით, რბოლის მიწურულს, „გაზიდან ფეხი აიღო“.

მოსმა ყველაზე გამორჩეული რბოლები 1961 წელს, მონაკოსა და ნურბურგრინგზე (გერმანია) მოიგო, რომლებიც ავტოსპორტის და ფორმულა 1-ის ყველა დროის კლასიკად იქცა. 1955 წელს, მოსმა „მერსედესის“ ლეგენდარული 300 SLR-ით, იმ დროს ერთ-ერთი ყველაზე გამორჩეული მარათონული რბოლა, მილე მილია მოიგო (1000 მილიანი რბოლა, რომელიც საერთო სარგებლობის გზებზე ტარდებოდა). წრიული რბოლების გარდა, მოსი რალისა და სიჩქარის რეკორდების რბოლებშიც ღებულობდა მონაწილეობას. ავტოსპორტის სხვადასხვა კატეგორიებში, ჯამში მას 200-ზე მეტი გამარჯვება აქვს მოპოვებული.

მოსი წლების განმავლობაში მონაწილეობდა ვეტერანთა რბოლებში. 2010 წელს მას კიდვ ერთი მძიმე ინციდნტი შეემთხვა - საკუთარი სახლის ლიფტის შახტაში, სამი სართულის სიმაღლიდან ჩავარდა, რა დროსაც, ფეხების მრავალჯერადი მოტეხილობა მიიღო. ამის შემდგ ვეტერანთა რბოლებშიც აღარ უასპარეზია.

2016 წელს, სინგაპურში ყოფნისას, ვირუსი შეეყარა, რომელმაც ხანგრძლივი ავადმყოფობა გამოიწვია. ავადმყოფობის დამარცხების მიუხედავად, 2018 წელს საზოგადოებრივი აქტივობა შეწყვიტა. მოსს 17 სექტემბერს 90 წელი შეუსრულდა.

0.118689