მადრიდის „რეალის“ პრეზიდენტი ფლორენტინო პერესი გუნდის მომავალზე სერიოზულად ფიქრობს და უახლოესი სატრანსფერო სამიზნეებიც მოინიშნა.
Marca-ს ცნობით, „სამეფო კლუბი“ 2020 წლის ზაფხულში ერლინგ ჰოლანდს, ხოლო 2021 წლის ზაფხულში კილიან მბაპეს შეიძენს.
ზინედინ ზიდანს ცენტრფორვარდი, ნამდვილი 9 ნომერი სჭირდება, რომელიც საჯარიმოში გუნდს გოლებით დაეხმარება. კრიშტიანუ რონალდუს წასვლის შემდეგ ეს პრობლემა მადრიდულ გრანდში აშკარად დადგა, კარიმ ბენზემა უკვე 32 წლისაა და მიუხედავად იმისა, რომ გოლებს იტანს, მისი თამაში მაინც იწვევს დისკუსიას.
ერლინგ ჰოლანდს კი საოცარი სეზონი აქვს და მიუხედავად იმისა, რომ „დორტმუნდს“ სულ რაღაც სამი თვის წინ შეუერთდა, დიდი შანსია, რომ ზაფხულში გერმანულ გუნდს დაემშვიდობოს. „რეალი“ მზადაა 75 მილიონი ევრო გაიღოს და ნორვეგიელი გადაიბიროს. არ დაგვავიწყდეს მინო რაიოლას სიტყვები, რომ ზაფხულში „რეალში“ დიდი ფეხბურთელი უნდა მიიყვანოს. ვინძლო სწორედ ჰოლანდი იგულისხმა.
2021 წლის ზაფხულის მთავარი გეგმა კი კილიან მბაპეა. ფრანგი პერესის და ზიდანის დიდი ხნის სამიზნეა და ოცნების ასრულებას გაისად ეცდებიან. ამისთვის ისიც საკმარისი იქნება, რომ მანამდე მბაპემ პსჟ-სთან კონტრაქტი არ გაახანგრძლივოს, „რეალი“ მზადაა ფეხბურთელს ნებისმიერი ეკონომიკური სურვილი შეუსრულოს.
