სხვა

20:29 | 8.04.2020 | ნანახია [] - ჯერ

ბახი კორონავირუსთან მებრძოლი ჯანდაცვის სფეროს წარმომადგენლების მიმართ მადლიერებას გამოხატავს

საერთაშორისო ოლიმპიური კომიტეტის (IOC) პრეზიდენტი თომას ბახი კორონავირუსის პანდემიასთან მებრძოლი ჯანდაცვის სფეროს წარმომადგენლების მიმართ მადლიერებას გამოხატავს.

„ჯანმრთელობის მსოფლიო დღეს (7 აპრილი) ვალდებულნი ვართ პატივისცემა გამოვხატოთ იმ ადამიანების მიმართ, ვინც ყოველდღიურად კორონავირუსის პანდემიას ებრძვის. მადლობა ყველა ექიმს, ექთანს, ჯანდაცვის თანამშრომლებს და მოხალისეებს. მადლობა თქვენი თავდადებისთვის და სიმტკიცისთვის. თქვენ ნამდვილი ჩემპიონები ხართ. როდესაც ეს ყველაფერი დასრულდება, იმედია, თქვენი თავგანწირვა, თქვენი ყველა მცდელობა დავიწყებას არ მიეცემა. თქვენ მიიღებთ იმ მხარდაჭერას, რომელიც ჭეშმარიტად დაიმსახურეთ.

ოლიმპიური საოზგადოების ბევრი წევრი და ბევრი ოლიმპიელი ათლეტი თქვენი გუნდის ნაწილია. ისინი მუშაობენ ჰოსპიტალებში და ჯანდაცვის დაწესებულებებში. ასე რომ, ამ უპრეცედენტო დროსაც კი სპორტი იმედს გვისახავს. დარჩით ძლიერები, აქტიურები, ჯანმრთელები (#StayStrong, #StayActive, #StayHealthy)," - მოგვიწოდებს თომას ბახი.

11 მარტს ჯანდაცვის მსოფლიო ორგანიზაციამ ახალი კორონავირუსის - COVID-19-ის პანდემია გამოაცხადა.

24 მარტს საერთაშორისო ოლიმპიური კომიტეტის პრეზიდენტმა თომას ბახმა და იაპონიის პრემიერ-მინისტრმა სინძო აბემ კორონავირუსის პანდემიის გამო ტოკიო-2020-ის ერთი წლით გადავადებაზე მოილაპარაკეს.

30 მარტს IOC-მა, ტოკიოს და იაპონიის მთავრობებმა XXXII ოლიმპიური თამაშების ახალი თარიღები შეათანხმეს. ერთი წლით გადავადებული ტოკიოს თამაშები გაიმართება 2021 წლის 23 ივლისიდან 8 აგვისტოს ჩათვლით.

GEONOC.ORG.GE

0.11958