მადრიდის „ატლეტიკოს“ მთავარმა მწვრთნელმა დიეგო სიმეონემ „ლივერპულთან“ გამარჯვების შემდეგ (3:2) კომენტარი გააკეთა. არგენტინელი სპეციალისტის განცხადებით, „ბარსელონასთვის“ შედეგები ლიონელ მესის მოაქვს, მისი გუნდისთვის - იან ობლაკს.

„ძალიან ბედნიერი ვარ ჩემი გუნდის გამო. დავამარცხეთ ძალიან ძლიერი მეტოქე და დავბრუნდით ევროპის საუკეთესო რვა გუნდში. „ლივერპულმა“ შესანიშნავად ითამაშა, მაგრამ ჩვენ შედეგი მივიღეთ.

ადრიანის შეცდომა? ფეხბურთში მოწინააღმდეგეს ცხოვრება უნდა გაურთულო. ვცდილობდით მასზე დიდი ზეწოლა მომხდარიყო, ფელიქსის, კოშტას და კორეას დახმარებით. მეორე გაშვებული გოლის შემდეგ არ დავნებდით და როდესაც პირველი გოლი გავიტანეთ, ვიგრძენი, რომ ყველაფერი ჩვენს ხელში იყო.

4-5-1 ტაქტიკურ სქემაზე გადასვლამ კონტრშეტევებზე თამაშის საშუალება და მომენტების შექმნის შანსი მოგვცა, ეს შევძელით. ლორენტეს გამოსვლა დაცვის გაძლიერებას ემსახურებოდა, მაგრამ სინამდვილეში ისე არ აღმოჩნდა, როგორც განზრახული გვქონდა.

ობლაკი ჩვენთვის ძალიან მნიშვნელოვანია, ისევე როგორც სავიჩი, ფელიპე, ფელიქსი... ჩვენ მსოფლიოში საუკეთესო მეკარე გვყავს. „ბარსელონაში“ არის მესი, რომელსაც გუნდისთვის შედეგები მოაქვს, ჩვენს შედეგებს მეტწილად ობლაკი განაპირობებს, ის მსოფლიოში საუკეთესო მეკარეა“, - თქვა სიმეონემ.

შეგახსენებთ, რომ „ატლეტიკომ“ „ლივერპული“ ორი მატჩის ჯამში 4:2 დაამარცხა. იან ობლაკმა კი „ენფილდ როუდზე“ საოცარი თამაში ჩაატარა და 11 სეივი შეასრულა.