ინგლისში მშვენივრად მოთამაშე ბრაზილიელი მეკარის, ალისონ ბეკერის შესახებ სპორტული პრესა მუდმივად წერს და ეს თავად ალისონის დამსახურებაა, რომელიც ბოლო დროს მართლაც რომ შესანიშნავად ირჯება და შეიძლება ითქვა, რომ მან იტალიიდან დიდ ბრიტანეთში გადაბარგების მერე სრულად გაამართლა გაცემული ავანსები.
ბოლო დროს ალისონის პირადი ცხოვრების შესახებ წერას ბრიტანულმა ბულვარულმა მედიამაც მოუხშირა. ჭორთმოყვარეები გამუდმებით ამბობენ, რომ ალისონი მიუხედავად ცოლიანი კაცის სტატუსისა, ცნობილი მექალთანეა და მას ბრაზილიიდან მოყოლებული არც იტალიაში და არც ინგლისში დაუკლია ლამაზმანებთან ხვანცალი.
ამასწინათ ალისონ ბეკერის ცოლმა, ნატალია ბეკერმა დაუფარავად აღიარა, რომ ეჭვიანობის სენითაა შეპყრობილი და ამის მიზეზს ქმრის თავაშვებულობა აძლევს. ნატალიას თქმით, მას ქმარი ბევრჯერ დაპირდა, რომ ერთგული მეუღლის მანტიით შეიმოსებოდა, მაგრამ კვლავინდებურად თავისუფალ ქალებზე აქვს თვალები დაჭყეტილი და თანაცხოვრების ასე გაგრძელება უკვე ძალიან ძნელია.
