„იუვენტუსის“ ფეხბურთელი ლეონარდო ბონუჩი მიიჩნევს, რომ კრიშტიანუ რონალდუ საბრძოლო მანქანაა და მისგან ბევრი რამის სწავლა შეიძლება. იტალიელი მცველი მაურიციო სარის გამჭრიახობითაც აღფრთოვანებულია და დარწმუნებულია, რომ მასთან ერთად წარმატებას მიაღწევენ.

„კრიშტიანუ რონალდუ საოცარი ფეხბურთელია, ნამდვილი საბრძოლო მანქანაა. დარწმუნებული ვარ, რომ მისგან ვარჯიშებზე ყველა ფეხბურთელი რაღაცაც სწავლობს, რაც განვითარებაში დაეხმარება.

სარიმ ძალიან გამაკვირვა თავისი ადამიანური და საფეხბურთო ინტელექტით. როცა მასთან საუბრობ, ხვდები რატომაც დანიშნეს „იუვენტუსში“, იცის როგორ განავითაროს გუნდი და ჩვენს თამაშში ბევრი რამ შეიცვალა, განსაკუთრებით დაცვაში, რადგან მხოლოდ ზონას ვთამაშობთ. ეს ადვილი არაა, მაგრამ სირთულეები არ მაშინებს.

დე ლიხტი ძალიან ნიჭიერი ფეხბურთელია. კიელინის ტრავმის გამო თავიდანვე მოუწია თამაში და ამიტომ გაუჭირდა ადაპტაცია. თუმცა ყველაფერი აქვს, რომ მსოფლიოში გამორჩეული მცველი გახდეს“, - განაცხადა ბონუჩიმ.

შეგახსენებთ, რომ „იუვენტუსი“ ჩემპიონთა ლიგის მერვედფინალში 26 თებერვალს, ფრანგულ „ლიონს“ სტუმრად დაუპირისპირდება.