იტალიის ჩემპიონატის 25-ე ტურის მიმდინარე მატჩი "სპალსა" და "იუვენტუსს" შორის პორტუგალიის ეროვნული ნაკრების თავდამსხმელის კრიშტიანუ რონალდუსთვის კარიერაში მეათასეა. რონალდუ კარიერის განმავლობაში ლისაბონის "სპორტინგის" სარეზერვო და პირველ გუნდში, "მანჩესტერ იუნაიტედსა" და მადრიდის "რეალში" თამაშობდა, ამჟამად კი ტურინული გუნდის ღირსებას იცავს.

Opta-ს მონაცემებით, კრიშტიანუმ ლისაბონური კლუბის სარეზერვო გუნდში ორი მატჩი ჩაატარა, ხოლო პირველ გუნდში - 31. "მანჩესტერ იუნაიტედის" მაისურით რონალდუმ 292 შეხვედრაში მიიღო მონაწილეობა, ხოლო "რეალის" მაისურით - 438-ში, სადაც 450 გოლი გაიტანა. "იუვენტუსში" პორტუგალიელი 2018 წელს გადავიდა და ახლა უკვე 73-ე შეხვედრას ატარებს, ხოლო პორტუგალიის ეროვნულ ნაკრებში კრიშტიანუს 164 მატჩი აქვს ჩატარებული.