იტალიის დედაქალაქ რომში მიმდინარე ევროპის ჩემპიონატზე თავისუფალ ჭიდაობაში ელიზბარ ოდიკაძე (97 კგ) წონით კატეგორიაში ნახევარფინალში დამარცხდა.

გამოცდილი ქართველი მოჭიდავე ფინალში გადასასვლელად რუს აბდულრაშიდ სადულაევს დაეჭიდა და დიდი წინააღმდეგობა ვერ გაუწია - 0:6. შედეგად, ფინალს მიღმა დარჩა და ხვალ ბრინჯაოს მედლისთვის იჭიდავებს. ელიზბარმა რომში თავიდან სომერი სარგის ჰოვეპიანი 5:0, ხოლო შემდეგ ბელარუსი დზიანის ხრამიანკუ 6:3 დაამარცხა.

აქვე გეტყვით, რომ 70 კგ წონით კატეგორიაში ნახევარფინალამდე წარმატებით მივიდა მირზა სხულუხია, მაგრამ იქ დამარცხდა და ოდიკაძის მსგავსად, ხვალ ბრინჯაოს მედლისთვის იბრძოლებს.

დღესვე ოთარ გოგავამ (57 კგ) პირველივე წრეში გეორგი ვანგელოვთან 0:9 წააგო და ვინაიდან შემდეგ ბულგარელი თავადაც დამარცხდა, ჩვენებურს ბრინჯაოსთვის ბრძოლის შანსიც დაეკარგა. 65 კგ წონით კატეგორიაში ვლადიმერ ხინჩეგაშვილმა აზერბაიჯანელ ალი რაჰიმზადესთან საწყის შეხვედრაშივე 0:7 წააგო და თავის მხრივ მისი მძლეველი ნახევარფინალში დამარცხდა და ლადომ ევროპის ჩემპიონატი ამ ერთი ბრძოლით დაასრულა. იგივე ბედი ეწია ნიკა კენჭაძეს, რომელიც თავიდანვე ჯაბრაილ ჰასანოვთან დამარცხდა და აზერბაიჯანელმა თავის მხრივ ნახევარფინალში განიცადა მარცხი და ნიკამ რეპეშაჟში ვერ გადაინაცვლა.