ფეხბურთი

10:40 | 13.02.2020 | ნანახია [] - ჯერ

სარი: "ჩემი საქმის მეთვალყურეობის ქვეშ ყოფნა რომ არ მდომოდა, ფოსტაში ვიმუშავებდი"

„იუვენტუსის“ მთავარ მწვრთნელ მაურიციო სარის ორიოდ დღის წინ პრეზიდენტი ანდრეა ანიელი პირადად შეხვდა და კლუბის მიერ ბოლო ორ კვირაში განცდილი ორი მარცხის გამო ესაუბრა.

შეხვედრის და საუბრის დეტალები უცნობია, თუმცა სარიმ ამის შესახებ კომენტარი „მილანთან“ მატჩისწინა პრესკონფერენციაზე გააკეთა. იტალიელი სპეციალისტის განცხადებით, როდესაც „იუვენტუსის“ მწვრთნელი ხარ, ბუნებრივია, რომ შენს სამუშაოს აფასებენ და აკვირდებიან.

„ანიელისთან შეხვედრა? ეს ჯერ კიდევ ერთი კვირის წინ იყო დაგეგმილი, მაგრამ გადაიდო და ახლა ვისაუბრეთ. ბუნებრივი პროცესია, რომ კლუბის პრეზიდენტთან ვსაუბრობ.

ისიც ნორმალურია, რომ ჩემი მუშაობა მეთვალყურეობის ქვეშაა, ფეხბურთში ჩვეულებრივი მოვლენაა, განსაკუთრებით „იუვეში“. რომ არ მდომოდა დაკვირვების ქვეშ ყოფნა, მაშინ ფოსტაში ვიმუშავებდი. მთლიანობაში სეზონი ჩვენთვის კარგად მიმდინარეობს და სამივე ტურნირში გამარჯვებისთვის ვიბრძვით“, - თქვა სარიმ.

შეგახსენებთ, რომ დღეს „იუვენტუსი“ იტალიის თასის ნახევარფინალში „მილანს“ სტუმრად დაუპირისპირდება.

0.115639