იტალიის დედაქალაქ რომში მიმდინარე ევროპის ჩემპიონატზე ამირან შავაძე (60 კგ) ნახევარფინალში გავიდა, თუმცა ამ ეტაპზე მარცხი განიცადა.

ჩვენებური ფინალში გადასასვლელ შეხვედრაში თურქ კერემ კამალს დაუპირისპირდა და პირველივე პერიოდში 0:5 ჩამორჩა და საბოლოოდ 0:9 დამარცხდა.

მანამდე ამირანმა შვეიცარიელი დიმიტარ სანდოვი და ფინელი ალექსი ლატვალა 8:0 დაამარცხა. ხვალ ქართველი ფალავანი ბრინჯაოს მედლისთვის იჭიდავებს, რაც ნაკრების დებიუტანტისთვის ურიგო შედეგი არ გახლავთ.

დღესვე ნახევარფინალში იჭიდავებს იური ლომაძე (72 კგ) და თურქ სელჩუკ ჯანს შეხვდება. ასევე დღეს, ოღონდ 21:00 საათის შემდეგ ფინალში 130 კგ წონით კატეგორიაში ლევან არაბული იასპარეზებს, ხოლო 55 კგ წონით კატეგორიაში ნუგზარ წურწუმია ბრინჯაოს მედლისთვის გავა ხალიჩაზე.