ინგლისის პრემიერლიგის კლუბების გადაწყვეტილებით ზაფხულის სატრანსფერო პერიოდი გაიზარდა. როგორც ჩემპიონატის ოფიციალური ვებგვერდი იუწყება, მეწილეთა შეხვედრაზე აღნიშნული თემა განიხილეს და კლუბებმა მხარი დაუჭირეს სატრანსფერო ფანჯრის პირველ სექტემბრამდე გახანგრძლივებას.
გასული ორი სეზონის გამნმავლობაში პრემიერლიგის კლუბებს ჩემპიონატის დაწყებამდე ჰქონდათ ტრანსფერების განხორციელების უფლება, ხოლო ევროპის სხვა ქვეყნებში სატრანსფერო ფანჯარა სექტემბრის დასაწყისში იხურებოდა.
აღნიშნულ გადაწყვეტილებაზე "ლივერპულის" მთავარმა მწვრთნელმა იურგენ კლოპმა განაცხადა, რომ ჩემპიონატის დაწყებამდე ტრანსფერების დასრულების იდეა კარგი იყო, მაგრამ არ იმუშავა.
"არ მაღელვებს როდის დაიხურება სატრანსფერო ფანჯარა, თუმცა ყველასთვის ერთ დროს უნდა შეწყდეს მოლაპარაკებები. საუბარი იყო ჩემპიონატის დაწყებამდე ტრანსფერების დასრულება, მაგრამ ეს მხოლოდ ინგლისში გააკეთეს. ამ ინიციატივამ შედეგი არ გამოიღო, კარგი იდეა იყო, თუმცა არ იმუშავა." - ციტირებს BBC-ი კლოპის სიტყვებს.
