ანსუ ფატის ნიჭზე აქამდეც არაერთი თქმულა და დაწერილა. „ბარსელონას“ ნიჭიერი შემტევი დიდ საფეხბურთო სცენაზე მიმდინარე სეზონში გამოჩნდა და უკვე რამდენიმე რეკორდი დაამყარა. კიდევ ერთ მიღწევას კი ახლახან შესწვდა.
„ბარსამ“ ლა ლიგის XXII ტურში „ლევანტე“ სწორედ ფატის წყალობით დაამარცხა. წარმოშობით გვინეა-ბისაუელმა თავდამსხმელმა ვალენსიურ გუნდთან 30-ე და 32-ე წუთებზე ორჯერ გაიტანა და საკუთარ გუნდს მნიშვნელოვან გამარჯვებაში დაეხმარა (2:1).
საინტერესოა, რომ ფატი ლა ლიგის ისტორიაში ყველაზე ახალგაზრდა ფეხბურთელი გახდა (17 წლისა და 94 დღის), რომელმაც დუბლი შეასრულა.
საერთოდ, ანსუსთვის რეკორდები უცხო ხილი ნამდვილად არაა. ჩემპიონთა ლიგაზე ყველაზე ახალგაზრდა გოლის ავტორია, „ბარსელონას“ ისტორიაში ლა ლიგაში ყველაზე ახალგაზრდული გოლიც მის ანგარიშზეა და ამასთან, ლა ლიგის ისტორიაში ყველაზე ახალგაზრდა მოთამაშეა, რომელმაც ერთ თამაშში გოლიც გაიტანა და საგოლე პასიც შეასრულა.
აქვე გეტყვით, რომ მიმდინარე სეზონში 17 წლის ფეხბურთელმა ყველა ტურნირის ჩათვლით 19 თამაშში 5 გოლის გატანა შეძლო.
