ფეხბურთი

19:59 | 7.01.2020 | ნანახია [] - ჯერ

დიეგო გოდინი "ინტერის" დატოვების მთავარი კანდიდატია

მილანის „ინტერისა“ და დიეგო გოდინის ურთიერთობა შესაძლოა 6 თვის შემდეგ დასრულდეს. Tuttosport-ის ინფორმაციით, მიმდინარე სატრანსფერო პერიოდში ურუგვაელი მცველის „ნერაძურიდან“ აბარგება გამორიცხული არაა.

საქმე ისაა, რომ გოდინს ანტონიო კონტე დიდად არ სწყალობს და ბოლოს ძირითად შემადგენლობაში 10 დეკემბერს, „ბარსელონასთან“ ათამაშა. მას შემდეგ გამოცდილი სამხრეთ ამერიკელი ზედიზედ სამი მატჩია სათადარიგო სკამზე ზის და კონტე 20 წლის ალესანდრო ბასტონის ამჯობინებს, რომელიც დაკისრებულ ამოცანას თავს ჩინებულად ართმევს.

აღსანიშნავია, რომ გოდინს საკმაოდ გაუჭირდა „ინტერის“ სათამაშო სისტემასთან ადაპტირება და მთავარი პრობლემა კონტეს საყვარელი სამ მცველიანი ტაქტიკაა.

შეგახსენებთ, 33 წლის გოდინი „ინტერს“ „ატლეტიკოდან“ ზაფხულში თავისუფალი აგენტის სტატუსით შეუერთდა და მიმდინარე სეზონში ყველა ტურნირის ჩათვლით 16 თამაში ჩაატარა, გოლი კი არ გაუტანია. ვეტერან ფეხბურთელს ყველაზე აქტიურად სტამბულის "გალათასარაის" უკავშირებენ.

0.153847