ანტუან გრიზმანი კატალონიის „ბარსელონაში“ ჯერჯერობით თავის პოტენციალს ბოლომდე ვერ ავლენს და კრიტიკოსებიც გამოუჩნდნენ. ფრანგმა კი, აღნიშნა, რომ ცენტრფორვარდის პოზიციაზე ბევრად უფრო მოსწონს თამაში, ვიდრე მარცხენა ფლანგზე.

„შეტევის ცენტრში თამაშის დროს თავს უკეთ ვგრძნობ, ორიენტირება უკეთ შემიძლია. ამ პოზიციაზე წლების განმავლობაში ვთამაშობდი, ახლა კი „ბარსას“ სათამაშო სტილთან მიწევს ადაპტირება. ბევრს ვსწავლობ და თავიდანვე ვიცოდი, რომ „ბარსელონაში“ რთული იქნებოდა“, - თქვა გრიზმანმა.

შეგირდი დაიცვა საფრანგეთის ნაკრების მთავარმა მწვრთნელმა დიდიე დეშამმაც:

„ატლეტიკოში“ მისთვის საუკეთესო პოზიციაზე თამაშობდა. „ბარსელონაში“ კატასტროფული სიტუაცია არ აქვს, მაგრამ შეიძლებოდა უკეთესიც ყოფილიყო“, - აღნიშნა დეშამმა.

შეგახსენებთ, რომ ანტუან გრიზმანი „ბარსელონაში“ გასულ ზაფხულს გადავიდა და დღემდე ჩატარებულ 15 მატჩში მხოლოდ 4 გოლი გაიტანა. ფრანგს „ბლაუგრანას“ რიგებში ძირითადად მარცხენა ფლანგის შემტევის პოზიციაზე უწევს თამაში, ხოლო ცენტრფორვარდად ლუის სუარესი ირჯება.