ფეხბურთი

20:55 | 3.11.2019 | ნანახია [] - ჯერ

"დინამო თბილისმა" შანსი გამოიყენა და გალიდერდა

„დინამო თბილისმა“ კონკურენტების წაფორიხლების ისარგებლა, სამმატჩიანი მოუგებელი სერია დაასრულა და კრისტალბეთ ეროვნულ ლიგაში გალიდერდა.

ფელის ვისენტეს გუნდმა „დინამო ბათუმისა“ და „საბურთალოს“ უქულოდ დარჩენის შემდეგ დიდებული საჩუქარი მიიღო, უკეთესს რომ ვერ ინატრებდა, და ბუნებრივია ქუთაისის „ტორპედოსთან“ მოედანზე მხოლოდ სამი ქულისთვის გავიდა.

თავის მხრივ, იმერულ გუნდში ვითარება არ იცვლება და ამ შეხვედრას ზედიზედ 5 წაგებით შეხვდა. კახა ჩხეტიანის გუნდი ასეთი წარმატებელი სერიის ფონზე რა გასაკვირია, რომ უკვე საგანგაშო ვითარებაში ჩავარდა.

„დინამომ“ მეტოქეს ადვილად აჯობა და მატჩის გმირი იმერელთა ყოფილი ფორვარდი ლევან კუტალია გახდა, რომელმაც პირველივე ტაიმში გადაწყვიტა მატჩის ბედი. ჯერ მე-20 წუთზე გახსნა ანგარიში, ხოლო შემდეგ ქიმაძე-კუხიანიძის კომბინაცია ახლო მანძილიდან ზუსტი დარტყმით დააგვირგვინა - 2:0.

დარჩენილ დროში „ტორპედო“ ეცადა, მდგომარეობა გამოესწორებინა, მაგრამ ვერ მოახერხა, მიუხედავად იმისა, რომ საგოლე მომენტებიც მრავლად შექმნა და გოლიც გაიტანა. „დინამომ“ კი მთლიანობაში მშვიდად იმარჯვა, რადგან მსაჯის მეხუთე დამატებულ წუთზე კიკნაძის გატანილმა გოლმა ვერაფერი შეცვალა, მატჩის იქვე დამთავრდა და დედალაქური გუნდი სატურნირო ცხრილის პირველ პოზიციაზე აღზევდა.

„დინამო თბილისს“ 66 ქულა აქვს და სეზონის დასრულებამდე სამი ტურით ადრე „დინამო ბათუმს“ 2 ქულით გადაასწრო. აი, „საბურთალოს“ შანსი კი კიდევ უფრო შემცირდა, რადგან ჯერ კიდევ მოქმედი ჩემპიონი ლიდერთან 5 ქულას აგებს და 3 ტურისთვის ეს მართლაც სერიოზული ჩამორჩენაა.

ქუთაისის „ტორპედომ“ კი ზედიზედ მეექვსე თამაში წააგო. შედეგად უკვე მე-7 ადგილამდე დაქვეითდა და პლეი-აუტს 2 ქულა აშორებს. იმერელთა სიტუაციას და სათამაშო ფორმას თუ გავითვალისწინებთ, საქართველოს ოთხგზის ჩემპიონის მდგომარეობა უკვე უშუალოდ მინდორზეც დამძიმდა.

„დინამო“ (თბ) – „ტორპედო“ 2:1 (2:0)

გოლები: 1:0 კუტალია (20), 2:0 კუტალია (34), 2:1 კიკნაძე (90)

0.157626