საქართველოს ნაკრების მთავარმა მწვრთნელმა ვლადიმირ ვაისმა გიბრალტართან (3:2) მატჩის შემდეგ განაცხადა, რომ მეორე ტაიმში მის გუნდს კონცენტრაციის პრობლემა შეექმნა. სლოვაკი სპეციალისტის თქმით, გიორგი ხარაიშვილის ტრავმამ გუნდზე უარყოფითად იმოქმედა.
"რა თქმა უნდა, მოპოვებული გამარჯვება და სამი ქულა მნიშვნელოვანია, მაგრამ ეს ადვილი არ იყო. ჩვენ ძალიან კარგად დავიწყეთ და საწყის 30 წუთში ორი გოლი გავიტანეთ.
პირველი ტაიმის შემდეგ ბიჭებს ვუთხარი, რომ კონცენტრაცია უნდა შეგვენარჩუნებინა, შეტევაში უფრო აქტიურად გვეთამაშა და მესამე გოლი გაგვეტანა. ამის შემდეგ ჩვენ შევძლებდით, რომ თამაში სრულად გაგვეკონტროლებინა. სამწუხაროდ, ტრავმა მიიღო ხარაიშვილმა, ამ მომენტმა გუნდზე, რა თქმა უნდა, უარყოფითად იმოქმედა, ნახევარდაცვაში და დაცვაში გარკვეული პერიოდი კონტროლი დავკარგეთ. ორი შეცდომის შედეგად ორი გოლი მივიღეთ.
გაგვიმართლა, რომ ბოლოს გოლი გავიტანეთ და მოვიგეთ, მაგრამ კიდევ ერთხელ ვიტყვი, რომ ეს არ ყოფილა ადვილი და მეორე ტაიმის გარკვეულ მომენტებში კონცენტრაციის პრობლემა იყო", - ციტირებს ვაისის სიტყვებს სფფ-ის ვებგვერდი.
შეგახსენებთ, საქართველოს ნაკრებს D ჯგუფში 7 მატჩის შემდეგ 8 ქულა აქვს და მეოთხე ადგილზეა, მომდევნო და ამ შესარჩევში დასკვნით მატჩს 15 ნოემბერს, სენტ გალენში, შვეიცარიასთან ჩაატარებს.
