ვეტერანი იტალიელი ფეხბურთელი კლაუდიო მარკიზიო, რომელიც ზაფხულიდან მოყოლებული უგუნდოდაა, კარიერას ასრულებს. 33 წლის ნახევარმცველმა 3 ოქტომბერს, „ალიანც სთედიუმზე“ პრესკონფერენცია დაგეგმა და იტალიური მედიის ცნობით, ფეხბურთიდან წასვლის შესახებ განცხადებას გაავრცელებს.

კარიერის დასრულების მიზეზი კი, მუდმივი ტრავმებია, რომელმაც იტალიელმა თავი 2016 წლის შემდეგ ვერ დააღწია.

მარკიზიო „იუვენტუსის“ აკადემიაში 1993 წელს მოხვდა და მთავარ გუნდში დებიუტი 2006 წელს ჰქონდა. „ბებერი ქალბატონის“ რიგებში 2018 წლამდე თამაშობდა და ამ პერიოდში ერთი სეზონი იჯარით „ემპოლიში“ გაატარა.

მისი ბოლო გუნდი კი, სანქტ-პეტერბურგის „ზენიტი“ აღმოჩნდა. „იუვენტუსში“ მარკიზიომ ჯამში 389 თამაში ჩაატარა და 37 გოლი გაიტანა. იტალიის ნაკრების ღირსება 55-ჯერ დაიცვა და მეტოქეთა კარი ხუთჯერ აიღო.