ფეხბურთი

2:59 | 17.09.2019 | ნანახია [] - ჯერ

ანსუ ფატი მოქალაქეობას იცვლის და მზადაა მსოფლიო ჩემპიონატისთვის "ელ კლასიკო" გამოტოვოს

კატალონიის „ბარსელონას“ თინეიჯერი შემტევი ანსუ ფატი მიმდინარე სეზონის აღმოჩენაა. 16 წლის ფეხბურთელი ისე შემოიჭრა დიდ ფეხბურთში თითქოს საკმაო გამოცდილება უმაგრებდეს ზურგს.

ბუნებრივია, ყველა ხვდება, რომ ფატის დიდი მომავალი აქვს, ყოველშემთხვევაში მეტად ნიჭიერია.

Mundo Deportivo-ს ცნობით კი, ესპანეთის ფეხბურთის ფედერაცია უკვე აქტიურად მუშაობს და ახლოსაა ანსუს ნატურალიზაციასთან. „ბარსას“ ახალბედა შემტევი გვინეა-ბისაუს მოქალაქეა, მაგრამ თითქმის გადაწყვეტილია, რომ ესპანეთის ნაკრებისთვის ითამაშებს.

თავდაპირველად ფატის 17-წლამდე ნაკრებში მიიწვევენ, რომელიც სულ მალე მსოფლიო ჩემპიონატზე ითამაშებს. სწორედ აღნიშნულ ტურნირზე შედგება ფატის დებიუტი „ფურია როხას“ წითელი მაისურით. 17-წლამდე მუნდიალი 26 ოქტომბრიდან 17 ნოემბრამდე ბრაზილიაში გაიმართება.

ასეთ შემთხვევაში კი ფატის „ელ კლასიკოს“ გამოტოვება მოუწევს, რომელიც 27 ოქტომბერს „კამპ ნოუზეა“ ჩანიშნული.

ბოლოსკენ შეგახსენებთ, ანსუ ფატიმ მიმდინარე სეზონში „ბარსელონას“ რიგებში ჩატარებულ 3 მატჩში 2 გოლი და 1 საგოლე პასი მიითვალა. საყოველთაო ყურადღებაც დამსახურებულად მიიპყრო.

სტატისტიკა
0.247249