დანიური „რანდერის“ ქართველი ფეხბურთელის საბა ლობჟანიძის შესაძლო ტრანსფერის შესახებ ზაფხულში არაერთხელ იწერებოდა, თუმცა, ჩვენებური „რანდერსში“ დარჩა.

საბას დამატება „ბრონდბიუს“ უნდოდა, ყველა მხარე თანახმა იყო ტრანსფერზე, ბოლო მომენტში შეთავაზებულ თანხაზე „რანდერსმა“ უარი თქვა და ქართველს კლუბში დარჩენა მოუწია.

„იმედგაცრუებული ვიყავი, როდესაც გაირკვა, რომ ტრანსფერი არ შედგებოდა, მაგრამ ეს წარსულში დარჩა. მიყვარს ფეხბურთის თამაში და მნიშვნელობა არ აქვს ეს „რანდერსში“ იქნება, „ბორნდბიუში“ თუ სხვაგან. „ბრონდბიუს“ ინტერესის შესახებ ხმები მეც გავიგე, მაგრამ ერთადერთი რისი თქმაც შემიძლია ისაა, რომ მომწონს „ბრონდბიუ“, რომელიც დიდი გუნდია“, - ციტირებს საბას სიტყვებს Tipsbladet.dk-ი.

შეგახსენებთ, ლობჟანიძეს „რანდერსთან“ კონტრაქტი 2020 წლის ზაფხულში ეწურება და მოსალოდნელია, რომ გუნდს ზაფხულში თავისუფალი აგენტის სტატუსით დატოვებს. 24 წლის შემტევს მიმდინარე სეზონში ჩატარებულ 8 მატჩში 4 გოლი აქვს გატანილი.