მადრიდის „რეალის“ კაპიტანი სერხიო რამოსი დარწმუნებულია, რომ მაღალ დონეზე თამაშს რამდენიმე წლის განმავლობაში შეძლებს. ესპანელ ფეხბურთელს როგორც გუნდურ, ისე ინდივიდუალურ დონეზე სურს ტიტულების მოგება.
რამოსი ოქროს ბურთსაც უმიზნებს და ამბობს, რომ თუ ეს ფაბიო კანავარომ მოახერხა, რატომ ვერ შეძლებს სერხიო რამოსი?
„ოქროს ბურთი? ინდივიდუალურ ჯილდოებზე საუბარი რთულია. ვან დეიკი დიდებული მცველია, რომელსაც ძალიან კარგი სეზონი აქვს. ყოველთვის კრიშტიანუსა და მესის შესახებ საუბრობენ, მაგრამ სასიამოვნოა, რომ ბრძოლაში სხვა ფეხბურთელებიც ერთვებიან.
მე ოცნებას არასდროს ვწყვეტ. მინდა „რეალთან“ ერთად ჩემპიონთა ლიგა მეხუთედ მოვიგო, ეს სიგიჟე იქნება, აგრეთვე, ესპანეთის ნაკრებთანაც ერთად მსურს ტიტულის მოგება. თუ კანავარომ შეძლო ოქროს ბურთის მოგება, რატომ არ შემიძლია მე?
საჭიროა ბავშვივით ოცნება, რომ ყველაფერი ახდეს. კარიერის დასრულებას რაც შეეხება, ეს მაშინ მოხდება, როდესაც ჩემი სხეული სიგნალს გამომიგზავნის. ახლა ვფიქრობ, რომ მაღალ დონეზე თამაში კარგა ხანს შემიძლია. ბევრი ფიქრობს, რომ ჩემი დრო დასრულდა, რადგან ენთუზიაზმი, ამბიცია მაკლია. მაგრამ მე ყოველთვის ვიმეორებ: ეს არის წელი, როდესაც მშიერი ვარ და მინდა ყველაფერი მოვიგო.
ცხოვრებაში სინანულიც საჭიროა, შეცდომებისგან ყველაზე მეტის სწავლა შეიძლება, რადგან გაკვეთილია. ძალიან ოპტიმისტი ადამიანი ვარ, ზოგჯერ ბედნიერი ვარ შეცდომებისგან, რადგან შესაძლოა ამან უკეთესი საქმე გამიკეთოს“, - თქვა რამოსმა.
