დანიის ნაკრები საქართველოში მთავარი მწვრთნელის ოგე ჰარეიდეს გარეშე ჩამოვიდა, რომელმაც მუხლზე ოპერაცია გაიკეთა. მის ნაცვლად კი სკანდინავიელებს ხვალინდელ შეხვედრაში იონ დალ ტომასონი უხელმძღვანელებს.

სწორედ მან გამართა მატჩისწინა პრესკონფერენცია და მედიის წარმომადგენელების კითხვებს უპასუხა. ტომასონმა გაიხსენა დანიის ნაკრების 15 წლისწინანდელი ვიზიტი თბილისში, როდესაც მატჩი ფრედ 2:2 დასრულდა, მაგრამ თავად ორი გოლი გაიტანა.

ტომასონი რთულ თამაშს ელოდება, მაგრამ მხოლოდ გამარჯვებას გეგმავს.

„მოხარული ვარ, რომ აქ დავბრუნდი, 15 წლის წინ ვითამაშე თბილისში და პირადად ჩემთვის ძალიან წარმატებული თამაში გამოდგა, რადგან ორი გოლი გავიტანე. ვიმედოვნებ, რომ ახლაც ასე იქნება და დანია კარგად ითამაშებს. ჩვენთვის ძალიან მნიშვნელოვანია ჯგუფში პირველი ადგილის დაკავება და გამარჯვება გვჭირდება.

თუმცა, ადვილ თამაშს არ ველოდებით, რადგან საშინაო მატჩი არასდროს ჰგავს საგარეო შეხვედრას და აქედან გამომდინარე თბილისში ადვილი თამაში არ გვექნება. საქართველო სახლში ყოველთვის კარგად თამაშობს და ანგარიშგასაწევი ძალაა, მაგრამ ჩვენ ძლიერი გუნდი გვყავს, გვჯერა ჩვენი შესაძლებლობების და აქ გამარჯვებისთვის ჩამოვედით.

ჰარეიდეს არყოფნა დისკომფორტს არ გვიქმნის, რადგან წნეხს მიჩვეული ვარ ჯერ კიდევ ფეხბურთელობისას. რა თქმა უნდა, ეს ჩემთვის ახალი როლია, მაგრამ დიდი პრობლემა არაა.

რობერტ სკოვი ძალიან ჭკვიანი მოთამაშება და ბევრს შრომობს. მხოლოდ ორი თამაში აქვს ნაკრებში ჩატარებული, მაგრამ ბუნდესლიგაში გადავიდა, ძალიან კარგი მწვრთნელების ხელშია და ჩენ გვჯერა მისი პროგრესის“, - აღნიშნა ტომასონმა.

იონ დალს მხარს დანიელთა კაპიტანი სიმონ კიაერი უმშვენებდა, რომელიც ლაკონური კომენტარით შემოიფარგლა:

„საქართველოს ნაკრებიდან ცალკეულად ვერავის გამოვარჩევ, რადგან მიმაჩნია, რომ გუნდურ ფეხბურთს თამაშობს და მისი მთავარი ძალაც გუნდური თამაშა", - დასძინა კიაერმა.

შეგახსენებთ, საქართველოსა და დანიის ნაკრებთა მატჩი 8 სექტემბერს, თბილისში, 20:00 საათზე გაიმართება.