სხვა

13:58 | 7.09.2019 | ნანახია [] - ჯერ

აკი ბაშო იწყება! საწყის დღეებში ქართველი სუმოისტების მეტოქეები ცნობილია

8 სექტემბრიდან აკი ბაშო იწყება, სადაც ტოკიოს “რიოგოკუ კოკუგიკანში” ტრადიციულად 2 ქართველი სუმოისტი ჩაებმება.

წლის მეხუთე სუპერტურნირის დაწყებამდე იაპონიის სუმოს ასოციაციამ საწყისი დღეების განრიგიც გამოავლინა და უნდა ავღნიშნოთ, რომ ტოჩინოშინს საკმაოდ რთული ორთაბრძოლები ელის.

რაც შეეხება ჩვენებურებს - ლევან გორგაძე ივლისის ბაშოს მუხლის ტრავმის გამო ტურნირს ნაადრევად გამოეთიშა, რაც იმას ნიშნავს, რომ ტოჩი კადობანშია ჩაყენებული და 15 ორთაბრძოლიდან დადებითი ბალანსის დაფიქსირება მართებს, წინააღმდეგ შემთხვევაში ოძეკის პრესტიჟულ ტიტულს დაემშვიდობება და მის დასაბრუნებლად ბრძოლა თავიდან მოუწევს.

აღსანიშნავია ის ფაქტიც, რომ ლევანი ამჯერადაც არ არის სასურველ ფორმაში, თუმცა ვიმედოვნოთ, რომ ტრავმა ხელს არ შეუშლის და მინიმუმ 8 გამარჯვების მოპოვებას შეძლებს.

ტოჩინოშინის პირველი მეტოქე აკი ბაშოზე აღმოსავლეთის მეორე მაეგაშირა იჩინოჯო იქნება, რომელთანაც ქართველ სუმოისტს აქამდე 22 ორთაბრძოლა აქვს გამართული და მოგება წაგების ბალანსი 17:5-ზეა ტოჩის სასარგებლოდ.

მეორე საშეჯიბრო დღეს კი ლევანი დასავლეთის მე-2 მაეგაშირა ასანოიამას დაუპირისპირდება, რომელთანაც ჩვენებურს მაისის ბაშოზე სკანდალური ორთაბრძოლა ჰქონდა. აღნიშნულ შეხვედრაში გორგაძეს ჯერ გამარჯვება ჩაუთვალეს, შემდეგ კი მსაჯთა კრებამ მოგება გაუუქმა და დოჰიოს მიღმა ფეხის გადადგმა დააბრალა, შედეგად გამარჯვება იაპონელ ვარსკვლავს დარჩა.

ამ ორთაბრძოლის შემდგომ ტოჩინოშინი რთულ ვითარებაში აღმოჩნდა, მაგრამ ქართველმა საბოლოოდ სასურველ შედეგს მიაღწია. აღნიშნული წყვილი აქამდე ერთმანეთს 5-ჯერ შეხვედრილან და ტოჩის ანგარიშზე 2 მოგებაა 3 მარცხის საპირისპიროდ. თუ ქართველი აღნიშნული ორთაბრძოლის მოგებას მოახერხებს, მათი ურთიერთშეხვედრების ბალანსი გათანაბრდება.

რანგით მეორე დივიზიონ ჯურიოში მოასპარეზე თეიმურაზ ჯუღელი კი აკი ბაშოს აღმოსავლეთის მე-10 ნომრის წოდებით შეხვდება. გაგამარუს შიკონათი ცნობილ ქართველს პირველი შერკინება მისთვის უხერხულ მეტოქესთან - კიოკუტაისეისთან მოუწევს. დასავლეთის მე-9 ნომერი ქართველ გოლიათს აქამდე 10-ჯერ შეხვედრილა და აქიდან 7 ორთაბრძოლა აქვს მოგებული.

აქვე გეტყვით, რომ გაგამარუს ელიტარულ სუმოისტთა შორის ადგილის შესანარჩუნებლად მინიმუმ 6 გამარჯვების მოპოვება მართებს. აკი ბაშო ხვალიდან აიღებს სტარტს და 22 სექტემბრამდე გაგრძელდება.

0.123311