ტოპ 14-ის ახალი სეზონი ჩინებულად დაიწყო მამუკა გორგოძესთვის. ქართველი მორაგბის „ტულონი“ პირველ ტურში „აჟენს“ ესტუმრა და 44:25 დაამარცხა.

აღნიშნულ გამარჯვებაში ქართველმა მორაგბემ მნიშვნელოვანი წვლილი შეიტანა, რადგან მეტოქე ორჯერ დაალელოვა. მე-13 წუთზე სწორედ მამუკამ მიითვალა შეხვედრის პირველი ლელო, 59-ე წუთზე კი, დუბლი შეასრულა.

გორგოძემ შეუცვლელად ითამაშა, ხოლო „აჟენის“ რიგებში 47-ე წუთიდან გამოჩნდა მოედანზე ანტონ ფეიქრიშვილი, რომელიც ფრანგულ გუნდს ცოტა ხნის წინ დაუბრუნდა.

ტოპ 14-ის მეორე ტური დამდეგ უიქ-ენდზე გაიმართება და „ტულონი“ „ბორდოს“ ესტუმრება, „აჟენი“ კი, „ბრივს“ საკუთარ კედლებში დაუხვდება.