ესტონეთის დედაქალაქ ტალინში მიმდინარე ახალგაზრდულ მსოფლიო პირველობაზე, დღეს, ბრძოლაში ბერძნულ-რომაული სტილით მოჭიდავეები ჩაებნენ. ხალიჩაზე 5 ქართველი ფალავანიც ვიხილეთ, რომელთაგან ორი – ლერი აბულაძე (63 კგ.) და გიორგი ქაცანაშვილი (87 კგ.) ნახევარფინალში გავიდა.

აბულაძემ პირველ წრეში უკრაინელ დმიტრო მიროშნიკს 5:4 სძლია, მერვედფინალში უზბეკი ჯავოხირბეკ სამატოვი 8:0 დაამარცხა, მეოთხედფინალში კი ბულგარელ ნიკალას პეტროვ სულევს აჯობა – 3:1. ფინალის საგზურისთვის ლერი ირანელ შაჰინ ეიდი ბადაგი მოფრადს შეერკინება.
თავის მხრივ, ქაცანაშვილმა გზიდან ირანელი ჰასან ჯაჰანბახშ ფურუზანდე გოიეჰბეიგლუ (4:0), იაპონელი რიოტა ნასუკავა (5:0) და შვეიცარიელი კრისტიან მაქს ზემპი (8:4) ჩამოიცილა, ნახევარფინალში კი ბელარუს იჰარ იარაშევიჩს დაუპირისპირდება.
რეპეშაჟში გადასვლის შანსს ინარჩუნებენ ნიკა შერბაკოვი (77 კგ.) და რობინზონ ესაძე (130 კგ.). ეს, იმ შემთხვევაში მოხდება, თუკი ის მოჭიდავეები, რომელთაც ჩვენებურებს სძლიეს, ფინალში გააღწევენ.
შერბაკოვმა მსოფლიო ჩემპიონატი ლიტველი არმინას ლიგნუგარისის ძლევით (3:0) გახსნა, ბელარუს მიკიტა კაზაკოუსთან გამარჯვებით (8:0) გააგრძელა, მეოთხედფინალში კი ნორვეგიელ ექსოს მუკუბუსთან 0:8 დამარცხდა. ეს უკანასკნელი ფინალისთვის რუს დამირ რახიმოვთან იჭიდავებს.
ესაძე კვალიფიკაციაში თავისუფალი იყო, მერვედფინალში ნორვეგიელ ნიკოლა მილატოვიჩს 6:5 მოუგო, მეოთხედფინალში კი ალიაკბარ ჰოსეინ იუსუფიაჰმადჩალისთან შანსი არ ჰქონია – 0:8. ირანელი ფალავანი ნახევარფინალში თურქ მუჰამატ ჰამზა ბაკირს შეეჯიბრება და თუკი იმარჯვა, რობინზონი სანუგეშო ტურნირში გადაერთვება.
სამწუხაროდ, მალევე დაასრულა ასპარეზობა ფრიდონ აბულაძემ. ის პირველივე წრეში უზბეკ იხტიორ ბოტიროვთან 3:5 დამარცხდა და ვინაიდან ეს უკანასკნელი შეჯიბრს მეოთხედფინალში დაემშვიდობა, აბულაძე რეპეშაჟს მიღმა აღმოჩნდა.
ნახევარფინალური ორთაბრძოლები დღეს საღამოს (18:15) ჩატარდება.