საქართველოს ნომერ პირველი ჩოგბურთელი ნიკოლოზ ბასილაშვილი ცინცინატში გასამართ მასტერსის პირველ წრეში კვალიფიკაციის გამარჯვებული შეხვდება. ტურნირზე ნიკოლოზი მე-15 ნომრადაა განთესილი და პირველ შეხვედრის მოგების შემთხვევაში გრიგორ დიმიტროვსა და სტან ვავრინკას შორის გამარჯვებულს შეხვდება.
კენჭისყრის შედეგად ასევე ცნობილია, რომ მესამე წრეში ანუ მერვედფნალში თუ გავიდა ქართველი პოტენციური მეტოქე როჯერ ფედერერი იქნება, რომელსაც გასულ წელს ფინალში გასვლის გამო 600 ქულა აქვს დასაცავი. ბასილაშვილს წინა წელს ტურნირზე მონაწილეობა არ მიუღია და შესაბამისად ქულა დასაცავი არ აქვს.
მოქმედი ჩემპიონი ნოვაკ ჯოკოვიჩი პირველ წრეში დაისვენებს და მეორე წრეში სემ ქუერისა და პიერ-უგო ერბეს შორის საუკეთესოს გაეჯიბრება. რაფაელ ნადალს კი კრისტიან გარნსა და ადრიან მანარინოს შორის საუკეთესო ელოდება. სასიხარულო ინფორმაციაა ენდი მარეის გულშემატკივრებისთვის, ბრიტანელი ტურნირზე "ველური ბარათის" წყალობით მოხვდა და პირველ წრეში რიშარ გასკე ელის. ენდი ერთეულთა თანრიგში ბოლოს ავსტრალიის ღია პირველობაზე გამოვიდა, მას შემდეგ კი წყვილებში თამაშობდა. მარეი თუ გაიმარჯვებს მეოთხე ნომერ დომინიკ ტიმს შეხვდება.
