„დინამო თბილისი“ ბოლო დროს ჩინებულ ფორმაშია და მოედანს გამარჯვების გარეშე აღარ ტოვებს. ამის ფონზე თვალში საცემია თბილისელთა 20 წლის ნახევარმცველის ნიკა ნინუას პროგრესი, რომელიც ფელის ვისენტეს გუნდის ერთ-ერთ ლიდერად ყალიბდება.

გუშინ, „ლოკომოტივთან“ შეხვედრაში იმედისმომცემმა შუახაზელმა ორი საგოლე პასი მიითვალა, მაგრამ აღსანიშნავი მისი დუბლი იყო - ორჯერვე სტანდარტული მდგომარეობა დიდებულად შეასრულა. საერთოდ, ნინუას მიმდინარე სეზონში 5 გოლი აქვს გატანილი და საინტერესოა, რომ ხუთჯერვე საჯარიმო დარტყმით! თავდაპირველად „ლოკომოტივს“ გაუტანა მაისში (1:3), შემდეგ „დინამოს“ „ჩიხურასთან“ მოაგებინა (1:0), ხოლო ახლა ისევ „რკინიგზელთა“ კარი აიღო, თანაც ორჯერ. ერთი ჯარიმაც ნიკამ ევროპა ლიგის პირველ საკვალიფიკაციო ეტაპზე გაიტანა, ანდორული „ენგორდანის“ კარში.

ძნელად გასახსენებელია ახლო წარსულში ქართველი ფეხბურთელი, რომელიც საჯარიმოებს მსგავსი შედეგიანობით ასრულებდა. ალბათ, პირველ რიგში ყოფილი დინამოელი ლაშა თოთაძე უნდა ვახსენოთ.

რაც შეეხება ნინუას, მისი დებიუტი „დინამოში“ ჯერ კიდევ 2016 წლის 26 ნოემბერს, ქუთაისის „ტორპედოსთან“ ცნობილ, საჩემპიონო მატჩში შედგა. პირველი გოლი კი 2017 წლის ივნისში „საბურთალოს“ გაუტანა, ეფექტური, თუმცა არა ჯარიმით. 2018 წლის სეზონში ახალგაზრდა ფეხბურთელმა ეროვნულ ლიგაში სამჯერ გამოიჩინა თავი და საჯარიმო დარტყმა არც მაშინ გაუტანია. თუმცა, ფაქტია, მიმდინარე სეზონში ხუთივე გოლი სტანდარტულიდან გაიტანა და ბუნებრივია, ეს შემთხვევითობა არაა.

შესაძლოა ვაჭარბებთ, შესაძლოა არა, მაგრამ ნიკა ნინუას ჯარიმებზე გინდა, არ გინდა, ლეგენდარული ბრაზილიელი ჟუნინიო გვახსენდება, თანაც, გვარებიც ეწყობა ერთმანეთს...