ფეხბურთი

1:42 | 12.07.2019 | ნანახია [] - ჯერ

ჭიაბრიშვილი: "საქმე ბოლომდე მიყვანილი არაა"

საქართველოს ჩემპიონის თბილისის „საბურთალოს“ მთავარმა მწვრთნელმა გიორგი ჭიაბრიშვილმა „შერიფთან“ (3:0) ტრიუმფალური მატჩის შემდეგ ისაუბრა და განაცხადა, რომ ასეთი სიამოვნება არასდროს მიუღია.

მიუხედავად ამისა, ქართველი სპეციალისტი ფეხბურთელებს ყურადღების შენარჩუნებისკენ მოუწოდებს და ამბობს, რომ საქმე ბოლომდე მიყვანილი არაა. ჭიაბრიშვილის პრესკონფერენცია „საბურთალოს“ ვებგვერდმა გამოაქვეყნა:

– მიუხედავად იმისა, რომ სტუმრად ვთამაშობდით, მატჩი ჩვენი უპირატესობით წარიმართა. კმაყოფილი ვარ, როგორც თამაშის ხარისხით, ასევე შედეგით. ვფიქრობ, ღირსეული გამარჯვება მოვიპოვეთ. თუმცა, ჯერ მხოლოდ ნახევარი გზა გავიარეთ, რამდენიმე დღეში განმეორებითი მატჩია და დაწყებულ საქმეს ბოლომდე მიყვანა უნდა. დარწმუნებული ვარ, რომ ამ თამაშით შედეგითა და თამაშით, ბევრმა ქართველმა გაიხარა.

მოვლენების ასეთ განვითარებას თუ ელოდით?

– მოგების სურვილი გვქონდა, ეს მატჩის წინა პრესკონფერენციაზეც ავღნიშნე, თუმცა სამბურთიანი უპირატესობით მოგებას არ ველოდი. ჯერ საქმე ბოლომდე არ არის მიყვანილი. როგორც ჩვენ შევძელით პირველ მატჩში სამ ბურთიანი სხვაობით მოგება, ანალოგიურის გაკეთება შეუძლია მეტოქესაც. განმეორებითი მატჩის წინ დიდი უპირატესობა გვაქვს, ყველაფერი თბილისში გადაწყდება.

ლევან კაკუბავა, რომელიც სათამაშოდ შეიყვანეთ, მანამდე არ ხურდებოდა. ცვლილება უცებ გადაწყვიტეთ?

– კაკუბავას მინდორზე შესვლამდე, “შერიფმა” გააკეთა ცვლილება. ჩანდა, რომ ნახევარდაცვის რგოლში გაძლიერება გვჭირდებოდა. ლევანმა მუხტი შეიტანა და ეს რგოლიც გააძლიერა.

ასეთი ზღაპრული თამაშის შემდეგ, რა უთხარით ბიჭებს გასახდელში?

– ჯერ არაფერი, მხოლოდ მადლობა გადავუხადე და თქვენთან, ჟურნალისტებთან წამოვედი. ახლა ყველა დადებით ემოციებში ვართ, ხვალ გავესაუბრები ფეხბურთელებს.

– “საბურთალოხშირად თამაშობს საინტერესო და სასიამოვნო ფეხბურთს, ასევე ბევრი მატჩი მოუგია. მოგებისგან ასეთი სიამოვნება თუ მიგიღიათ?

– ჩემთვის ყველა მოგება, განსაკუთრებით სასიამოვნოა. ახლა რასაც ვგრძნობ, ძნელია ასე კიდევ ბევრმა რამემ გამახაროს.

შეგახსენეთ, საპასუხო მატჩი 16 ივლისს, თბილისში, 21:30 საათზე გაიმართება.

Loading...
0.12853