ქართველმა სუმოისტმა ლევან გორგაძემ იგივე ტოჩინოშინმა იაპონიის ქალაქ ნაგოიაში მიმდინარე საზაფხულო სუპერტურნირზე ზედიზედ მე-5 მარცხი განიცადა და დიდი ალბათობით, შეჯიბრს ნაადრევად დაემშვიდობება.
ტოჩინოშინი ნაგოიას ბაშოს დასავლეთის მე-2 ოძეკის წოდებით შეხვდა, თუმცა, მუხლის ტრავმის გამო, დოჰიოზე სრული დატვირთვის ვერ ირჯება და ეს, მის შედეგებზეც აისახება.
დღეს, ქართველი სეკიტორი აღმოსავლეთის პირველ მაეგაშირა ასანოიამასთან იორიკირით დამარცხდა და ვინაიდან დადებითი ბალანსის (კაჩი-კოში) დაფიქსირებისთვის ბრძოლა უპერსპექტივოდ მოსჩანს, სავარაუდოდ, ბაშოდან მოიხსნება და მის ხვალინდელ მეტოქეს, აღმოსავლეთის პირველ კომუსუბი აბის ავტომატური გამარჯვება ჩაეთვლება.
ელიტარულ მაკუუჩი დივიზიონში მაქსიმალური შედეგით 4 სუმოისტი ლიდერობს: იოკოძუნები ჰაკუჰო და კაკურიუ და რიგითი მაეგაშირები ტომოკაძე და ტერუცუოში.
ცუდად მისდის საქმეები გაგამარუს შიკონათი ცნობილ თეიმურაზ ჯუღელსაც, რომელიც რანგით მე-2 დივიზიონ ჯურიოში დასავლეთის მე-2 ნომრის წოდებით ირჯება.
ქართველმა გოლიათმა ერთადერთი მოგების წილ მე-4 მარცხი (იორიკირით) დასავლეთის მე-4 რეიტინგოსან ტაკანოშოსთან განიცადა. ნაგოიას ბაშოს მე-6 დღეს გაგამარუს პირისპირ აღმოსავლეთის მე-3 ნომერი ჩიიოშომა დადგება, რომელთან ურთიერთშეხვედრებიც ჩვენებური 1:2 მარცხდება.
