ავტოსპორტი

15:31 | 10.07.2019 | ნანახია [] - ჯერ

ფორმულა 1-ში „ალფა რომეოს“ მომდევნო სამიზნე „მაკლარენია“

„ალფა რომეოსთვის“ ავსტრიის დიდი პრიზის რბოლა ყველაზე შედეგიანი იყო მიმდინარე სეზონში - მისმა ორივე პილოტმა ფინიშის ხაზი ათეულში გადაკვეთა და ქულა აიღო. კიმი რაიკონენმა მე-9 ადგილი დაიკავა, ანტონიო ჯოვინაციმ კი - მე-10.

შვეიცარიაში ბაზირებულ გუნდს 22 ქულა აქვს და კონსტრუქტორთა ჩემპიონატში მე-6 ადგილი უკავია. მას 10 ქულით „რენო“, 30 ქულით კი „მაკლარენი“ უსწრებს. რაც მთავარია, „ალფა რომეოს“ ხელმძღვანელობას ეს არ აკმაყოფილებს.

„ვფიქრობ, ბოლო ორ რბოლაში კარგი პროგრესი გვქონდა. და ოდნავ გაუმჯობესება გვჭირდება იმისათვის, რომ „მაკლარენთან“ ბრძოლა შევძლოთ. და ეს ჩვენი მომდევნო მიზანია. ბოლო რბოლებში ისინი ჩვენს წინ იყვნენ. თუმცა ჩვენ კარგ განახლებებს ვგეგმავთ, გვაქვს სილვერსტოუნის პაკეტი და სხვა სიახლეები გერმანიის და უნგრეთის ეტაპებისთვის. და მაინც, რეალისტები უნდა ვიყოთ, ყველა დაუზოგავად მუშაობს და სიახლეები მათაც ექნებათ“, - ბრიტანულ გამოცემა „ავტოსპორტთან“ საუბრისას განაცხადა „ალფა რომეოს“ გუნდის შეფმა ფრედერიკ ვასერმა.

მანვე ჯოვინაცის პროგრესიც აღნიშნა. ვასერის თქმით, იტალიელის ბოლო რბოლების კვალიფიკაციებში ძალიან სწრაფი იყო. პირველი ქულის აღება კი მისი თავდაჯერებისთვის ძალიან მნიშვნელოვანი იქნება.

„მისი სისწრაფე ეჭვს არ იწვევდა. საკითხავი მხოლოდ ის იყო, თუ როდის აიღებდა პირველ ქულებს. მან ძალიან კარგი რბოლა ჩაატარა და ეს მისთვის მეტად მნიშვნელოვანი საფეხური იყო“, - ამბობს ვასერი.

Loading...
0.127968