ფეხბურთი

3:35 | 7.07.2019 | ნანახია [] - ჯერ

"არწივმა" "ლომი" დაჯაბნა - აფრიკული კლასიკა ნიგერიამ მოიგო (+VIDEO)

აფრიკის თასის გათამაშება გრძელდება და მორიგი ორი მეოთხედფინალისტი გამოვლინდა - ნიგერია და სამხრეთ აფრიკა.

მერვედფინალის გამორჩეული დუელი ნიგერიისა და კამერუნის ნაკრებებს შორის შედგა. აფრიკული კლასიკა, მიუხედავად იმისა, რომ არცერთ ნაკრებს ოქროს ხანა არ უდგას, მაინც ყოველთვის საინტერესოა. ახლაც გაამართლა მოლოდინი და ერთობ დრამატული დაპირისპირების მომსწრენი გავხდით.

თავიდან ნიგერია დაწინაურდა ოდიონ იგალოს გოლით, მაგრამ „სუპერ არწივებისთვის“ პირველი ტაიმის დასასრული კოშმარული გამოდგა. სამწუთიან ინტერვალში სტეფენ ბაჰოკენმა და კლინტონ ნ’ჯიემ კამერუნის ნაკრები დააწინაურეს. „ლომებისთვის“ პირველი ტაიმი იდეალურად დასრულდა და მეორე ნახევარში ანგარიშის შენარჩუნებას ლამობდნენ.

თუმცა, კლარენს ზეედორფის გუნდმა დასახული ამოცანა ვერ შეასრულა. ჯერ იგალომ გაათანაბრა, მერე ალექს აივობიმ ნიგერიას მეოთხედფინალის საგზური მოუტანა.

მეოთხედფინალის, სადაც სამხრეთ აფრიკა ელოდება. არადა, „ბაფანა ბაფანა“ მასპინძელ და ტურნირის ერთ-ერთ ფავორიტ ეგვიპტეს ხვდებოდა და ძნელად წარმოსადგენი იყო, რომ ფარაონები მეოთხედფინალს მიღმა დარჩებოდნენ. თუმცა, მოჰამედ სალაჰმა ვერაფერი გაახერხა და ლორჩის თამაშის დასრულებამდე 5 წუთით ადრე გატანილმა გოლმა აფრიკის თასი უმასპინძლოდ დატოვა.

აქვე შეგახსენებთ, რომ მეორე მეოთხედფინალურ წყვილში ბენინი და სენეგალი შეხვდებიან. დანარჩენი ოთხი მერვედფინალი კი ჯერ არ გამართულა.

ნიგერია - კამერუნი 3:2 (1:2)

გოლები: 1:0 იგალო (19), 1:1 ბაჰოკენი (41), 1:2 ნ’ჯიე (44), 2:2 იგალო (63), 3:2 აივობი (32)

ეგვიპტე - სამხრეთ აფრიკა 0:1 (0:0)

გოლი: 0:1 ლორჩი (85)

0.133511